【職場求生術】7個你要懂的公司執笠凶兆 | cpjobs
Home > Career Advice > 打工仔職場故事 - 名家分享 > 【職場求生術】7個你要懂的公司執笠凶兆

【職場求生術】7個你要懂的公司執笠凶兆

Published on Wednesday, 13 Mar 2019

職場最大惡夢相信係公司執笠,因為遇上此情況,你工作表現如何出色都係無得撈。今次就由三位過來人,分享公司執笠的凶兆。

1. 公司像老人院

公司同事唔係伯伯就係嬸嬸,得你一位算係後生仔,聽起來似乎只係悶啲,然而要留心如果老細都長者級,有一日老闆決定榮休,就索性遣散員工,不幸中之大幸係呢類Case一般都會賠到足。

2. 接班人上場

老闆交棒予外國留學回港的子女,係唔少中小企常見的「情節」。不過子女上場後往往會大搞轉型,放棄有錢賺的本業,押注全新的業務。押錯注的話,資本有限的中小企就唯有執笠,押中的話,接班人又可能趁有價將成檔生意賣走,轉手後新老闆都可能將包括你在內的舊人遣散便算。

3. 公司改名轉戶口

有時老闆以轉運或革新品牌為藉口,忽然將公司轉名。如果純粹改名就無乜嘢,但要留心公司內有流言改名前公司資產、資金已轉到另一間公司,改名後的公司只是空殼,這便肯定係執笠前契了,

4. 財政亂夾遲

公司執笠關鍵原因係錢搞唔掂,綜合過來人經驗,最常出現的兇兆係先遲出糧,繼而由自動轉賬改為出支票,而出票日子一再推遲。接下來就係財務部同事陸續跳船,出現此訊號時,基本上你可以搵定工了。

5. 自然流失 + 炒散化

公司無錢,很自然要縮減人手資本。當看到公司任由員工自然流失,又或炒掉人工較高舊人,改聘兼職甚至外派炒散員工,令公司員工恍如走馬燈轉唔停,便顯示公司有機會缺水且有執笠危機。

6. 老闆神隱

細公司老闆通常都會日日現身睇實員工有沒有偷懶,甚至連老闆娘都會坐鎮公司指揮。但當老闆及老闆娘由日日現身,變為隔日現身,再變為一星期一次、一個月兩次,並遲遲不覆電郵,而每次現身又會帶來睇公司再入會議室密議,就似係賣盤格局,賣盤不成自然係執笠了事。

7. 員工變老闆

員工變老闆不一定像蓮香樓般美好,更多情況係老闆向員工埋手刮多一筆。一般有兩種模式,一是老闆坦言公司唔掂,邀請員工入股共渡時艱;二是老闆揚言公司好掂,好應該給予機會讓員工認購股份分享成果。兩種情況結局都係倒錢落海,如果你遇上老闆拋出的入股建議,就要加倍留神了。

 


以上文章刊於《招職》。

Become our fans