【職場航行日誌】老闆,唔該停一停諗一諗 | cpjobs.com
Home > Career Advice > 名家分享 > 【職場航行日誌】老闆,唔該停一停諗一諗

【職場航行日誌】老闆,唔該停一停諗一諗

Published on Friday, 23 Oct 2015
圖:Shutterstock

一個緊張大師嘅老闆,係好易令員工情緒崩潰。每次老闆一用力打開度玻璃門想開口嗰一刻,大家就會警覺,開始冒汗。唔係要你趕野,就係大聲夾惡搵人出氣,咪洗旨意有好野。

 

老闆做野係根據怕得罪客嘅程度黎分先後,遇到搞唔掂嘅煩客打嚟,事無大小,淨係識「係、係、係」嘅對答,然後一收線就會好鼓燥咁衝過嚟。同事有時俾佢突然間咁大動作嚇到即刻企起身,以為有大件事要咁急,原來不過係幫個客申請Claim返番活動開支。「阿晴,嗱嗱聲同我入晒啲單俾Account嗰邊,好似四點鐘Cut數,我即刻入房E晒啲單過嚟俾你。 」抬頭望一望個鐘,顯示為三點四十五分。「老闆……我手頭上呢……」阿晴嘅眼神極度無助,明明雙手無喺Keyboard停過,要五點前要入晒百幾張Sick leave form俾經理出Report,仲要無啦啦被老闆踩多腳,加多對手都做唔切啦。

我地打份工嘅,做野係睇階級高低嚟分先後,作為同事於心何忍,因為我地隨時係下一個受害者,就快手快腳幫阿晴分類整理好啲單。「係咪得啦!我要覆番個客啊!」三點五十五分,心急如焚嘅老闆又催,「Double check緊,我叫左Account俾多十五分鐘等埋我地既,你放心。 」老闆行過去阿晴旁邊望到個Mon實一實,指手劃腳指揮佢入Data手腳快啲,「點搞啊?又打錯字?你睇清楚先啊好唔好?」阿晴忍住度氣,Keyboard聲愈打愈響。

同一時間,一連串嘅高踭鞋聲出巡,驚嚇不斷。「咦?你咁得閒係度整啲Claim單既?唔記得我叫你入假紙?」同老闆乞人憎嘅口吻如出一轍。「入咗大部分架啦,頭先老闆話要……」正當解釋之際,老闆有感自己面子受損,「我係叫佢Urgent幫我搞左啲Claim單先嘅,用佢十五分鐘時間啫!正常唔會影響到佢做其他Task架喎。 」係呢個時刻唔識出面維護,兜兜轉轉,又將個波一腳踢番俾個「因為聽你話」而受氣嘅小員工度。

入職時聽聞老闆以前由低做起,應該好明白基層嘅辛酸,不過好快就發現佢做老闆過盛嘅氣焰,周不時無理咁惹火頭。而且佢係典型嘅結果論者,當員工係工具,我地日曬雨淋幫佢揼石仔,就算成功起到層樓,都只係「工作需要」,從來唔理會其實係同事「抵得諗」、「肯搏」。

老闆,唔該你停一停,諗一諗。你出糧俾員工唔係一份功勞,係責任。員工肯落足心機做好份工唔係責任,其實唔多唔少係願意為你加上光環嘅一個行動嚟架。

 


 

Become our fans