「又到聖誕～又到聖誕～」嚟到12月，Holiday mood已經提早來襲。聖誕氣氛處處，有唔少同事已經開始幫個office佈置，迎接呢個普世歡騰嘅節日。大家辛苦咗一年，好多公司或者個別部門嘅老細，都會趁住年尾嘅聖誕節，同同事攪返個聖誕Party慶祝一下，尤其係上年個個work from home或者因為疫情緣故，想搞都無得搞。回想起出嚟社會做嘢嘅第一個聖誕，唔知你有冇期待過公司個party？又或者你轉咗工之後，對新公司嘅聖誕Party又有冇過咩期望？我相信唔多唔少想當年都總會有FF過，不過⋯⋯現實總係不似預期。

1. FF早放的浪漫

平安夜，聖誕前夕呢啲浪漫日子，打工仔會可惜呢日唔係公眾假期，但今年有少少唔同，因為係星期六嚟。通常公司嘅聖誕Party就通常都會選擇安排喺24號舉行，今年應該會擺喺23號掛？（我諗）。有Party開，嗰日返工嘅心情亦自然會輕鬆啲。記得當年第一次開完party大家都玩到癲癲地，已經冇乜心情做嘢。平安夜都算係西方嘅大時大節，做冬都有得早放，順利成章都期待下開完Party老細會宣布可以早啲收工。唔好意思，原來都係FF多咗，玩完唔該返埋位做嘢，唔到6點唔好走。

2. FF任食好嘢

當老細宣佈決定開聖誕party，大家都會表現得十分雀躍。開party最緊要係食，一講到食，開party嘅500小時前，身邊嘅同事們已經好興奮咁討論緊今年食咩好。

「食pizza加炸雞，公司樓下嗰間都唔錯喎。」
「唔好啦，不如試下新嘢。」
「隔離新開嗰間壽司？」
 

就係呢個時候，一位新入職冇幾耐，太年輕嘅少女衝出嚟話：
 

「好呀！嗰間啲刺身好正，我要三文魚刺身同埋吞拿魚刺身。平時食好鬼貴，今次公司請梗係食盡佢啦。」
 

呢個moment大家都靜咗幾秒鐘望住佢，然後我輕輕咁搖頭同佢講：「少女，你太年輕喇，唔好FF啦，個party最後大家要夾返錢。」
少女望住我呆咗兩秒，然後⋯⋯返咗埋位乖乖地做嘢。

3. FF聖誕禮物

開聖誕party又點少得聖誕禮，早排我就喺Instagram見到個朋友話佢公司派錢畀佢地買聖誕禮物畀同事，唔駛出錢又有禮物收，聽到都覺得好玩。成日都聽啲朋友講，佢地公司個聖誕party會有獎抽，老細會派現金獎，仲聽過有Annual Leave抽呀。係咪攪到第一年參加公司聖誕party嘅你充滿幻想呢？唔係我想破壞你嘅FF，只不過現實與理想都總係有啲距離。好多時其實都係自己買份禮物去交換，好彩嘅都有班好同事陪你玩，唔好彩嘅，你都係自己禮物自己買啦。

4. FF一定有party

個個都開聖誕Party，唔通個個都想開聖誕Party咩？最終極嘅FF就係你以為一定有得開但最後冇得開。講到party呢個字，有嘢食、有獎抽、有遊戲，你以為咁開心嘅節目一定好多人想參加。終於等到老細秘書出E-mail叫大家報名，誰不知過咗報名deadline之後，秘書姐姐話總共只有小貓三四隻參加。呢個又話攞咗假，嗰個又話約咗人，唔好意思，都係cancel喇。