其實我用訓導處嚟形容人力資源 ( HR ) 部門應該係最貼切不過！對於好似盧騷王呢啲小薯嚟講，其實喺一間公司入邊，會令到我哋又愛又恨嘅，絕對離唔開會計同人力資源呢兩大部門。

先講入職前，去大公司面試通常至少都要見兩、三輪，包括HR代表及應徵職位所屬的部門主管。唔知大家同我係咪一個諗法，面試時對住部門主管比起對住HR容易應付得多，因為前者只係需要展示自己的工作知識和能力，但係去到見人力資源部面試官就完全係兩件事。

因為HR會檢視你嘅性格、外表、言談舉止等，佢哋大多數都係只要覺得你聽教聽話、唔姿整、外觀正常得體，甚至係冇不良嗜好就OK啦，但係以上呢一啲形容詞真係好主觀。

最常見嘅就當然係頭髮嘅顏色、身上有冇煙味、化妝化得誇唔誇張等。曾經試過有一次好經典嘅，就係有個男同事的手指尾留了少少指甲，嗰位人力資源部同事咬住唔放，同佢講完冇反應之後就同佢老細講係都要佢剪指甲先至肯收手！其實每個人都有自己嘅Character，就算係係外觀上需要處理，應該係負責公司品牌形象嘅同事比返指示等大家去Follow，而唔係因為HR嘅主觀睇法而去執法。

又有一次有個女同事嘅頭髮染咗紅色，其實都唔係好紅嗰一隻，不過就比人力資源部出警告信要佢染返黑。最好笑嘅就係嗰位同事染返黑色之後，英國總部委派咗個新嘅女Regional Director上場，而佢個頭咁啱就係紅色，咁大家又諗下究竟結果係點？嗰位女同事直接同新老闆講，而新老闆就直接同HR嗰位女士講：「我非常明白作為HR部門係需要按照公司嘅規矩管理好內部員工，但係喺唔影響公司形象嘅情況下，員工嘅打扮包括頭髮嘅顏色係有佢哋嘅自主權，我哋係冇需要亦都唔應該去管束佢哋。如果公司係有咁嘅規矩，咁我亦會即刻將頭髮染返深色。」

以上文章刊於《招職》。