Career Advice 名家分享

【職場盧騷王】老細有鑊就卸落嚟 皆因當我係……

「面係人哋比,架就係自己丟。」我諗呢句說話個個都聽過,但係正確啲來講:面就係所有打工仔要畀老細嘅,架就係我哋做細嘅丟!因為我哋會隨時做老細嘅垃圾桶、做佢哋嘅出氣袋,畀佢將啲肉酸野射晒落我哋度比佢哋係咁丟!

 

撈咗咁多年,筆者同大家一眾打工仔都絕對面對過無情白事幫老細孭鑊!記憶中係出事嘅時候,會自己一力承擔嘅老細真係屈指可數:最常見嘅就係佢哋講過唔算數,話冇講過,一係就話唔記得咗!呢啲都係出事嘅時候,老細對你講得最多嘅一句說話!好似個男人被老婆捉到去咗滾一樣,冇證冇據蛇咬都唔認!你頂唔順嘅話就要離婚(轉工)㗎啦!

 

喺外人面前重衰,踩到你賤過地底泥!「都係我條Team冇溝通好!」、「唔好意思我啲細嘅冇Send過出嚟!」、「我冇批過過出嚟!」、「我冇批過喎,佢哋出咗?」、「我同佢哋講咗,唔知點解佢哋都係錯,我返去真係要好好咁教育一下佢哋!」念力低啲,真係會懷疑自己嘅能力。

 

呢啲說話我真係聽到唔少,如果對方係眉精眼細嘅話,應該聽得出睇得見老細將嚿屎Pass咗過嚟。但係好多客都係唔會理,冇人會同情你!公司衰咗,老細將垃圾射落嚟你度,你就要硬食。

 

要記住差唔多所有老闆都係咁,搵到個好嘅老細固然重要,但係好人家邊有咁容易搵到啊?為兩餐真係點都要死忍,如果唔係就分手收場。老實講,分得幾多次呀?打工仔為生活,唔慣都要慣㗎啦!鬼叫係「三無」階層,手停口停呀!