一個老闆，真正可以做到放任不管，由頭到尾信任跟你嘅員工，相信係最完美嘅事。而完美嘅事，出現嘅機率一定係微乎其微。

開一間舖頭仔，無論實體店或網店，已經可以自稱老闆。可能係因為香港嘅職場好重階級主義，分得好清楚你係卒仔定係管理層，會係兩種完全不同嘅待遇。大家都會嚮往一跳跳咗上管理層後，除咗職位及人工都有晉升之外，最好玩嘅係擁有從來未得到過嘅權力。

所以有啲人一旦轉型做咗老闆，就會突然自我感覺良好，以為上咗位做上等人，喜歡擺起個款對人指手劃腳。以前當佢仲係做別人下屬嘅時候，每日對人對事都好謙卑，深知自己係能力不足所以停留喺原位，個個搵幫手都一定讚佢係最抵得諗嘅一個。可惜，人嘅諗法隨住成長，好容易受到周邊嘅事物動搖一貫嘅想法。

一開頭抱著一般熱情去開展生意，當然為咗減低成本會事事親力親為，個份滿足感真係足以蓋過所有辛勞。期後有員工嘅加入，生意開始穩定夠交租，人就變得心紅起嚟，覺得自己有實力和料子管理好一盤生意。身邊嘅伴侶同家人開始吹噓附和，就愈嚟愈認同自己係「成功人士」。慢慢形成一種心態就係︰我而家做咗老闆，做咩仲要咁辛苦，叫啲細嘅去搞掂咪得囉！我以前都係咁捱架啦！好運氣你唔好好掌握，用完就無架啦！慶幸佢有請到一班上心嘅員工，一整年以嚟係運作上都安然度過，遇有小問題佢地識得見招拆招，就縱容到老闆嘅惰性出晒嚟，開始唔再著緊生意上嘅細節，只係每個月睇吓盤數，有錢賺就繼續安枕無憂。員工雖然口裡不說，但係站係前線好明顯感覺到老闆理會生意嘅心思有幾多。

好啦，直到公司有設施開始損壞，就發現原來從來無考慮過點去維修，隔幾耐時間要檢查，有啲重要嘅設備一壞咗可能就立即做唔到生意！做老闆唔係只去要求最大粒個位經理負全責要係最短時間入面解決，而係佢要有後備計劃，做到員工決定唔到嘅事。一直對員工講有幾關心佢地感受，有幾照顧佢地需要，會係佢地最強後盾，一件事就可以反映到究竟係咪美麗的謊言。

當態度開始崩壞時，問題就接踵而至，人嘅經歷係為咗成長，而放喺做生意上，更加係要急促成長先捉到多啲機遇。否則，過咗幾年，就會因為自以為是，到最後只還原基本步，得到嘅全部瞬間失去。

以上文章刊於《招職》。