Career Advice 名家分享

【職場航行日誌】世界盃特赦假期?

話咁快嚟緊又四年一度嘅世界盃開鑼,身邊嘅球迷朋友已密密計劃緊去朋友屋企定係派對場所觀賞賽事。賽事主要集中喺香港夜晚及凌晨時分開場,一班忠實球迷勢必捱更抵夜為自己喜歡的隊伍捧場吶喊。

一晚半晚通宵眼皮仲可以勉強應付到,但持續咁多日,第二朝返工時一定精神不足,靈魂未歸位,工作出錯機會大增。部分香港老闆喺呢段「特別日子」有特別安排,除咗建議球迷員工請年假觀賞賽事,亦允許員工輪流以彈性時間返工。雖然呢個提議聽落唔錯,不過就要視乎所屬嘅行業適唔適合。

球迷同事阿權一聽到呢個消息第一時間好興奮咁話:「正呀,如果我地公司都實行就好啦!其實四年先一次,公司應該行多啲政策多體諒員工,我地每晚加班到9點無補水,間唔中安排返呢類福利比我地都好啊,公司又唔會因為咁而賺少咗錢。」小熊不禁插嘴,「不過咁啊,我地人事部大部分工作要日日Run,唔係要請人安排面試,就係要計糧搞活動,平時請一日假都要同阿頭一早度期,唔可以撞到啲交功課嘅重要日子。想有得特赦?睇怕都無可能,我已經死心!」

阿權上司耳仔好靈敏,對眼即刻厲一厲過嚟,向佢潑冷水:「咁你請咗假,邊個計糧先?仲有啊,你手頭上果三個Project仲有十個空缺未請到,而家唔夠人開工,地盤個邊嘈得好緊要。」阿權抓抓頭,好無癮咁坐返埋位,苦笑一句:「睇嚟我都係無福消受,叫女朋友幫我錄低翻睇啦!」上司贏盡優勢:「其實翻睇咪一樣,仲好啦,鍾意幾時睇都得!」其他同事只能向阿權投以同情嘅目光。

我地唔應該奢望任何嘅特赦,世界盃又好,奧運又好,做得打工仔就彷彿被賣身,只能聽從上頭要求。想特赦,就默默禱告憑自己嘅能力,有一日特赦自己離開鬼地方吧!

 


以上文章刊於《招職》。