阿星自從升職咗做經理，工作量大增，處理嘅Headcount由200個急升到800個，好在佢深明食得咸魚抵得渴嘅道理，升職加咗人工梗要表現下自己嘅勤快和能力，咪多啲黎密啲手。但係有一個棘手和尷尬嘅問題，就係佢要Head住以前同期入嚟嘅「兄弟」。一得知阿星升職嘅消息，大家心入面都好興奮好替佢開心，但唔敢咁公開衝埋去恭喜佢，因為落選個位傑仔就正正坐喺佢前面。

傑仔都曾經同相熟嘅同事呻過佢係心有不甘，點解係佢輸，Why me？佢認為同阿星嘅分別在於出眾嘅能力唔同，傑仔係踏實型，出咗名加班鐘數最多嘅，當初佢成日俾老闆指責佢出嘅E貓英文甩皮甩骨無人睇得明，佢就自己買書上網花時間自學，老闆知道佢對份工咁上心有點名稱讚過，佢本著一分耕耘，一分收穫嘅心，付出咗會有人知嘅諗法去做野。而阿星呢，佢本身唔係特別聰明，亦唔常加班，但係同事點解會覺得老闆揀阿星係正解呢，除咗平時佢喺工作上好有自己Systematic嘅一套又有效率之外，就係佢有堅持嘅底線，有獨特個人色彩，要上管理層，係需要呢種人。一到正式排上新銜頭個日，傑仔煞有介事咁立即變得好客氣，阿星就一直提著自己唔好有偏私之嫌，同時亦唔想傑仔有任何Hard feeling，仲可以好似以前咁兩兄弟拍住上嘅，等有升職機會就推傑仔一把上去，就係最好結局啦。

可惜，傑仔一反常態。佢已經唔想再掩飾內心嘅憤怒，每逢阿星俾野傑仔做佢都牙痛咁款，一係就將Deadline拖得就拖，一係就話同其他User department傾野都係交返俾經理負責因身份上較恰當。明明有啲Case係傑仔跟開，佢都想轉個手俾晒人唔想再理，好明顯覺得以前自己做咁多都無好回報，點解仲要咁傻攬晒上身做？

阿星好清楚咁樣落去唔係辦法，就搵咗個下午捉傑仔入房傾，希望佢坦白講出心入面嘅諗法。「其實有部分工作一向都係Ad hoc野嚟，我覺得係時候交返出嚟，等我可以專心做好Core duty，唔係以前一直我做開就要繼續做，Why me？好唔公平囉，其他人就咁輕鬆準時收工，點解得我要OT咁耐先？Why me？」平心而論，阿星知道傑仔嘅優點就係一向比其他人更投入刻苦，更抵得諗，按指示可以將每個Project完善咁做好。但係傑仔眼見同期嘅朋友有得晉升，所以佢唔想呢個刻苦形象跟住佢啦，佢都想話事，做少啲指揮多啲。要跳出框框係需要好大進步先得，而喺去到新階段前，就先放棄咗原本自己嘅優勢，好易累咗自己。

「點解唔係Why not呢？好多時Ad hoc task久而久之就變埋Core duty，我都有呢個煩惱，做咗10次，20次，老闆都未轉交俾其他人做，咁唔通我就嬲爆爆直至做到第100次？好啦，既然呢個Project變咗我主力負責，我點樣學到有效率地完成晒老闆對呢個Project嘅所有要求？唔好俾個Task控制你，諗啲計仔可以每次有信心例行公事咁搞掂佢，佢就再唔會係你要日日記掛住嘅負擔。 」阿星想講嘅係，面對不安有壓力，立即耍手擰頭話「唔關我事」，老闆聽完可能就成全你以後咩都唔使跟，做少啲，相對地你「被需要」嘅程度就會愈來愈低，咁仲點可能升你做阿Head？

得著係自己嘅，真係有太過份嘅事要有理據地出聲，唔係死忍到人地覺得你唔妥開口問先嚟發晒脾氣講。做得打工仔，明知無可能事事咁計較，問太多Why me又無實際行動只會表現你未夠成熟，咁人地點揀得落你呢？

以上文章刊於《招職》。