貴為未結婚的上班族，豬年返工第一擊當然係逗利是，要收割額外收入又避免增加職場仇口，出擊前就要先用「消去法」做準備。

評估跟隊資格

返工逗利是攻略通常都會提到兩點，一是有心逗利是就唔好初五請假；二係最好組隊游走各部門逗利是。

由於初五通常較初四更齊人，初五切忌請假這一點係值得參考的。不過加入逗利是大隊，你就應該考慮一下自己的資格。一般來講，這類熱鬧一下的活動都係Junior級超後生同事的專利，皆因隊員年紀同人工都係入門級，已婚同事都唔好意思指他們貪封利是。

但假如你年過三十兼升到較Senior職級，雖然自問未結婚又心境年輕，但跟隊拎利是始終顯得有點突兀，半路被人揶揄又或之後被人唱衰就更得不償失。

篩走「無望」人士

不論你選擇組隊游走各部門逗利是、一人行動，抑或孖住一、兩名好友同事出擊，切忌逢人就攔截問人拎利是。正所謂不打無把握的仗兼要保住面子，出擊前最好先篩走「無望」人士。

通常你同部門同組上司及同事，除非係無可救藥地縮骨，否則都會準備定利是。至於同部門同組的未婚上司，為意頭為鼓勵下屬，同樣會樂於大派利是。基本上向這三類目標埋手，逗利是成功率高達九成。

至於不同部門又或不同組的已婚同事，只要平日大家算熟絡，一般都唔太介意贈你一封利是。但唔熟的話，特別是平日向對方打招呼都無反應，即使你開口問，食檸檬機會都高達七成 。

還有一點職場新鮮人要牢記，公司清潔阿嬸、維修技工或OA，即使他們是資深已婚人士，都不要厚著臉皮向他們逗利是。皆因他們人工有限，無乜理由要在公司大派利是，你無端端走上前拎利是，就有機會被對方大庭廣眾大大聲教訓一番，咁樣被人「開年」就真係樣衰了。

最後還不妨考慮一招，正所謂有來有往，既然過年後屋企收埋唔少朱古力、糖果，就索性拎兩盒作為逗利是道具。問同事拎利是時，除了意頭說話，更誠意邀請對方揀粒糖或朱古力作回禮，對方收到甜頭，派利是條氣都會順好多。