【職業特搜】想做Social Media Executive 先決條件係瞓得少 | cpjobs
Home > Career Advice > 職業特搜 > 【職業特搜】想做Social Media Executive 先決條件係瞓得少

【職業特搜】想做Social Media Executive 先決條件係瞓得少

Published on Wednesday, 12 Sep 2018

背景:阿明 —— 喺Agency做咗兩年Social Media Executive

人工及晉升機會
17,000元

入行人工約萬七元,有出色表現的話,有機會晉升成為Senior Social Media Executive,再進一步就升呢至Digital Marketing Manager。當然長遠一點,就可以向Director級別目標進發。
壓力指標
做呢行主要有三大壓力來源,一係諗橋,要快又要有計,稍為大腦閉塞心都慌;二係湊客,遇上要求多多又唔得罪得的大客,就要諗辦法拆掂他們的要求;三係無得瞓,趕死線,覆個客,做圖做片出帖,都可以無窮無盡消耗你的時間。做得呢行,收夜晚八點要感恩,收兩、三點甚至連續幾日通頂係家常便飯,瞓得少加上腦力Burn out,自然壓力倍增。
增值指標
這一行進修增值,未必係講讀多個學位,而係學多樣用得著的技能,拍片、剪片、後製、混音,識得愈多肯定愈好
 
問: Social Media Executive要有乜野入職要求?
 
答:持有大學學位,三文三語係基本要求,唔少人以為主修創意媒體入呢行一定有優勢,但親身觀察,好多讀呢科嘅後生仔因為對創作有自己一套睇法,未必適應到這一行講求變通的生態,反而主修其他科目,如社會科學、哲學嘅人,識得用另一角度去創作,反而在這一行有更強競爭力
 
問:面試會問乜?使唔使Show portfolio?
 
答:公司一般會睇應徵者對創作的睇法,還有他們對整個Social Media生態有幾深認識,亦會睇睇他們交上來的創作實例。為了解他們真正實力,難免會考下應徵者啲橋有幾掂,例如會要求應徵者即場按設定客戶要求度一個推廣方案。所以見得呢類工,你要有心理準備花更多時間面試同筆試。
 
問:工作做啲乜?
 
答:有一定規模公司,手頭上都有一些客的Project跟緊,做Social Media Executive,首要工作係幫手跟好啲Project,度橋、搞Post出Post、跟拍嘢都係日常核心工作。同廣告公司一樣,要發掘新客,就要參與比稿 ( Pitching ),Social Media Executive都要幫老細諗Idea,再製作比稿材料,增加吸新客勝算。
 
問:有乜工作指標?
 
答:老細同客都係睇數,Like數、View數一定要追到足,另外老細都會睇你湊客的效率,遲咗覆個客,又或Hea個客,都係足以令升職加薪扣分的指標。
 
問:性格大師唔適合呢行?
 
答:做呢行,講得難聽啲你見同組同事一定多過見另一半同屋企人,所以想入行的,一定要拋棄創作人一定係性格大師及孤獨精的無謂偏見。工時長加上需要緊密合作,如果你係性格大師的話,相信在這一行難以生存超過三個月。由於我們工作涉及不少設計、拍片及製作工作,少不免會與Vendor合作。Social Media Executive同時擔任中間人及「追數」角色,既要保持與唔同Vendor保持連繫溝通,亦要在創作水準及效率上好好把關,千萬不要被Vendor牽著鼻子走,否則好多進度都係得個等字。
 
問:點解做呢行?
 
答:呢行雖然辛苦,但工作唔會悶,客戶來自各行各業,生意好時每日基本上沒有冷場。而且身處網絡時代,這一行的需求很大,儲夠經驗既可以在行內公司更上一層樓,識得策動Social Media推廣,想跳槽去大機構傳訊部「油水位」,亦有相當的優勢,所以實際一點講,係值得投資時間同腦力去儲實戰經驗的。
 
Become our fans