【職業特搜】 Digital Marketing Manager 最考跑數「續航力」 | cpjobs
Home > Career Advice > 職業特搜 > 【職業特搜】 Digital Marketing Manager 最考跑數「續航力」

【職業特搜】 Digital Marketing Manager 最考跑數「續航力」

Published on Thursday, 27 Sep 2018

背景:Raymond —— 喺Agency做Digital Marketing Manager逾六年

人工及晉升機會
35,000元

成功爬上Digital Marketing Manager位置,一般都有3.5萬元月薪,當然生意好的話,年尾花紅普遍都過60,000元。至於晉升機會,第一級可以跳升至Senior Digital Marketing Manager,再進一步就可以晉身Director級別,成為公司高層。
壓力指標
搞得Digital Marketing,最少有三大壓力:諗橋、湊客及追死線,作為主管就多一樣管人壓力。Digital Marketing Manager可能同時領導幾個小組,而通常呢行啲人都較有性格,加上行內高手都算搶手,點樣催谷他們效率及工作質量,又唔好激走佢哋,既考管理人功力,亦是Digital Marketing Manager另一壓力來源。
增值指標
理論上讀多個碩士會較好,MBA固然係熱門選擇,不過講到含金量更高又更實用嘅,係讀啲與電子商務及Marketing有關的碩士課程。
 
問:Digital Marketing Manager要有乜野入職要求?
 
答:持有大學學位,三文三語係基本要求,更重要係實戰經驗。不論係爭取在Agency內部晉升或跳槽到大企業傳訊部,其實都好睇你有冇以年計的實戰經驗。一般來說,至少要累積三年實戰經驗,並有一堆拎得出來推銷自己的成功案例,才有把握挑戰更上一層樓成為Digital Marketing Manager
 
問:面試會問乜?
答:雖然都會問應徵者對創作睇法,又或對Social Media生態有幾了解。但這位置始終係管理人,面試會花更多時間了解你對管理下屬的看法及經驗。另一焦點「話題」係你湊客的經驗及技巧,最好數到經自己手吸納有幾多勁客,並提出一些有效解決客戶疑難的實際個案,當然更重要係講解一下自己發掘新客的經驗,清晰地呈現自己的身價
 
問:工作做啲乜?有冇工作指標?
答:除非你係在蚊型公司做Digital Marketing Manager,否則做得呢個位,可能同時帶領兩、三個小組,同時湊著至少六、七個客戶。因此每日核心工作係跟進度,又或構思新的推廣方案,同時亦要留意各項目的反應是否達標,跑唔夠數就要再諗計催谷。

當然,發掘新客係另一重要工作,所以每季都會參與新客戶的比稿,除了篩選及修訂下屬構思的比稿方案,很多時自己都會親自落場幫手諗。除了透過比稿吸新客,稱職的Digital Marketing Manager亦要擴大自己的專業社交網絡,在個人人脈上尋找吸客機會。

因此,最重要的工作指標係跑數,只要跑足數甚至超額完成指標,自己的位置自然穩陣,甚至可以獲得推薦晉升的機會。
 
問:湊客有乜秘訣?
答:平日最常保持緊密連繫,除了自己的下屬及Vendor,作為Digital Marketing Manager,另一角色係擔任與客戶的連繫人。假如你一味將難搞又要求多多的客戶推比下屬湊的話,最大的風險係下屬湊得掂,轉頭就可能跳槽帶個客走。另一風險係下屬不斷激嬲個客,最終令客戶流失,這筆賬都係入你數。所以最好都係親力親為湊好個客,唔好一味旨意下屬搞掂。
 
問:點解做呢行?
答:現在Digital Marketing係各行各業兵家必爭之地,各大企業都想到要擴闊商機及提升企業形象,都深信「得網得天下」。所以累積到成績,繼續在Agency發展固然不愁沒有晉升機會,同時亦有不少人會轉到大企業或政府機構,擔任網絡推廣的旗手。近年另一趨勢係一些晉身為Director級別的高層自己創業,爭取獲種子基金或大企業投資甚至收購的機會,一旦成功就可能涉及以千萬元計的回報。
 
Become our fans