人地唔要你 又何必苦苦堅持
Home > Career Advice > How To Plan And Start Your Career Path > 人地唔要你 又何必苦苦堅持

人地唔要你 又何必苦苦堅持

Published on Monday, 14 Feb 2022

朋友呀蛋最近好燥咁連Send咗一堆WhatsApp比我,佢話佢最近去間好想入嘅公司見工,Final in.面試過程氣氛好好,感覺好似好大機會請。點知佢等咗兩個星期都冇消息,於是膽粗粗打去問間公司嘅HR,點知個HR同佢講,佢地唔會考慮佢。

 

佢收咗線之後諗諗下覺得好唔忿氣,雖然死咗,但都想知道死因,於是又打去比個HR,問佢自己衰咩。HR小姐本來唔太想同佢講,喺呀蛋一再追問下,於是就話佢知:「老細見過幾位Candidate之後,覺得另一個Candidate個性格更加適合佢團隊。」

 

呀蛋聽完之後覺得好唔合理,又繼續追問:「我性格有咩唔啱,邊方面唔啱?」

 

對方就冇再解釋落去,同佢講呢個係老細嘅決定,佢地都改變唔到。

 

呀蛋之後Send咗一堆WhatsApp比我「投訴」,話個HR有冇搞錯,咁嘅原因都講得出,唔啱就唔好叫佢Final in.之類,bababababa......

 

我嘗試同佢解釋,其實HR都冇計㗎,呢啲決定都係老細做,而且Final in.唔係包生仔,唔擔保請硬㗎。但佢仲好唔忿氣,仲話諗住再打電話去搵高層理論。

 

呢個時候,我突然諗起早兩日同個失戀朋友傾計嘅WhatsApp對話。我呢位失戀朋友叫呀輝,佢本身有個拍咗3年拖嘅女朋友,佢地一直非常恩愛,呀輝甚至視佢女朋友為結婚對象。不過最近呀輝發現女友對佢開始變得冷淡,冇幾耐女友就以冇感覺為由而提出分手。呀輝苦苦哀求,不停問女友分手原因,對方大概意思係話因了解而分開。呀輝非常不忿,甚至懷疑對方係咪有第三者,堅持去明查暗訪要搵出真相。呢段時間呀輝活喺愛與痛的邊緣,作為老死當然要同呀輝傾多啲計安撫下佢。

 

我將同呀輝嘅一段說話Copy出嚟改咗少少Send比呀蛋:

「我覺得,搵工嘅嘢同拍拖分手都係一樣,如果對方唔珍惜你,你亦無必要再花時間喺佢身上。比你知道分手原因又點?結果一樣唔會變。苦苦堅持經已沒意思,不如花時間喺其他人身上,總會搵到個珍惜你嘅」。

 

之後呀蛋覆咗個喊樣比我話「咁又係 ⋯⋯」,希望佢唔好再去滾搞個HR啦。

HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans