6個面試成功嘅訊號 | cpjobs
Home > Career Advice > How To Job Seek In Hong Kong > 6個面試成功嘅訊號

6個面試成功嘅訊號

Published on Monday, 07 May 2018

去完心儀嘅公司面試,過完一關又一關,最後終完打完大佬見完老細,然後佢同你講:「返去等消息啦!」返去等消息呢幾個字真係好折磨人,等呢段時間嘅感覺,直頭好似去海馬公園玩跳樓機,被人升咗上半空之後等佢跌落嗰下咁漫長。如果要我比呢段等待加上一個感覺嘅期限,我會話係一萬年。

去面試好緊張,但等結果期間更緊張。好多時我地去面試,見完之後都唔知機會有幾大。不過其實我地可以回想一下面試過程有冇出現過一啲正面嘅訊號,令我地可以唔多唔少猜測到面試嘅成功機率。

1.面試官嘅身體語言

喺面試過程入面,你可能覺得為咗應付面試問題已經自顧不暇,仲邊有咁多時間留意面試官嘅身體語言,但其實對方嘅身體語言某程度上反映緊佢對你嘅興趣有幾大。例如喺談話過程中,佢身體向你嘅方向傾斜,同你有緊密嘅眼神接觸,或同你對話嘅時候不停點頭,都係反映緊佢對你嘅興趣。

2.對你嘅專注程度

大老細貴人事忙,抽到少少時間出嚟做面試已經皇恩浩蕩。見工嘅時候留意下佢對你嘅專注程度,例如會唔會得閒睇下電話、得閒睇下電腦、望你嘅次數有幾多、對你講嘅說話有冇反應等。佢喺你身上愈專注,你成功嘅成數就愈高。

3.有冇Follow up你嘅答案

好多人都好怕被面試官挑戰自己嘅答案,但面試過程係一種溝通,面試官就住你嘅答案再問你,可以係一種對你有興趣嘅訊號。佢嘅目的只係想搞清楚你嘅想法,係咪符合佢公司嘅要求。如果面試只係有一問一答,就會好似一澤死水,了無生氣。

4.佢講幾多嘢比你聽

面試除咗去答問題,我地都要留意對方同我地講啲咩。你可以留意下佢有冇主動介紹下公司、職位所屬嘅部門、工作內容、大家嘅工作時間,甚至介紹下附近有咩食、辦公室個廁所喺邊度。只要佢講得愈多及越仔細,你成功嘅機會就愈高。因為如果佢對你冇興趣,同你講多句都無謂。

5.勁Sell你公司嘅好處

如果面試官對你嘅興趣夠大,其實佢可能會主動吸引你加入佢地公司。佢會同你講下間公司嘅願景、希望做到啲咩、佢點樣符合到你嘅要求、點樣幫到你將來嘅Career。有聽過有啲老細直頭帶埋求職者參觀公司,甚至介紹埋同事比佢識。如果見到呢啲訊號,證明佢好想得到你嘅效力,一切可能只待人工傾掂數。

6.面試後嘅Follow up

好啦,見完大老細返屋企等消息有一日突然電話響,見到來電顯示係佢地打嚟,點知竟然唔係出Offer,只係打嚟問你攞資料。聽電話嗰下一心以為得米,點知原來唔係,嗰下難免有啲失望。不過呢個係其中一個好大嘅訊號,再問你攞更多資料,證明已經進入最後批核階段,交齊文件後,相信離出Offer之日都不遠了。

HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans