Career Advice Job seek in HK

【搵工攻略】10大貼士幫你增加求職成功率 搵工轉工話咁易

搵到搵唔到,唔係靠彩數。「搵工」,除咗喺網上求職平台(例如CPjobs)Search keywords睇下有咩新Job opening之外,當中仲包含更新履歷表(CV),準備面試同埋見工之後嘅跟進部署等等。所有嘅準備都係為咗畀未來僱主見到自己嘅工作能力,從而獲得工作機會。好多打工仔轉工唔順利,好多時未必係運氣問題,有可能係準備不足,個人未Ready都未定。

今日就預備咗10個貼士,睇下做完之後有無改善!

 

1. 問下自己想要啲咩

啱啱畢業搵緊工嘅你,訴求可能只係「返工」,或者諗住咩都試下;而做咗幾年嘢想轉工嘅你,可能係因為待遇問題,唔想Underpaid。呢啲諗法都唔係錯,但可以諗多啲:我哋心目中有無一個清晰嘅職涯路線圖(Career path)同時間表?有嘅話,咁有咩長期同短期嘅目標?一路伸延落去,我哋可以點樣達成?

假如你已經諗到呢度,睇嚟你已經好清楚自己想要啲咩。未諗到咁遠,都可以預備下,因為有啲公司喺Interview嘅時候,好常問呢類問題。

 

2. 睇下自己有咩能力

嘗試開個Word file / Notepad,列出自己有咩技能,無論係實用技能(如Microsoft Office,Photoshop,AI等),抑或係Soft skill(如溝通技巧,語文能力)都可以寫出嚟,對自己嘅能力做一個基本嘅評估,有邊啲係比較叻,有邊啲只係有基本認識。有呢個List之後,當你見到心儀嘅職位空缺,你會好容易比較到自己係咪符合要求,或者缺少啲乜嘢。呢啲都可以令你更加清楚點樣Present自己,或者日後可以點樣改進。

 

3. 寫好你嘅履歷表同求職信

當你了解自己嘅技能同工作經驗之後,就可以開始執整份CV。CV,最重要係容易閱讀,用最少嘅信息量,突出你最多嘅優點,令HR或者你嘅未來上司可以憑字面上知道你大概適唔適合。

有一樣嘢必須要注意,要做校對(Proofreading)確保內容無錯字,呢個係印象分,非常重要。

 

4. 求職網站唔止淨係搵工

喺求職網站入面,除咗Search keywords搵工之外,通常都會有Job alert功能,簡單幾個Click就可以設定喜好(Job industry / Job function),當有適合自己嘅職位空缺出現,你就會收到電郵通知,減少自己錯過機會。另外,網站亦會有唔同工種行業嘅求職攻略或者業界分享,呢啲都可以幫助你搵工。當然,如果你係心儀外資公司或者大型企業,佢哋會有自己嘅Career page,職位空缺未必會擺喺求職網站,如果你心目中有啲公司好欣賞,不妨Check下。

 

5. 起底要做到足

見到啱嘅職位,入面嘅工作內容亦有興趣,係咪代表適合自己?未必㗎。呢個時候你需要花少少時間做下資料搜集,從公司嘅網頁,社交平台,甚至新聞,去了解下呢間公司係一間咩公司,睇下適唔適合自己,或者你適唔適合公司。當然,多啲了解喺見工過程亦會有幫助嘅。

 

6. 履歷表同求職信要花啲心機

係嘅,而且申請職位係好簡單方便,輕輕撳個Apply Now就得。但同一個職位,入面要求嘅工作經驗同技能都會好唔同,如果你可以按照唔同職位,度身訂造一份適合嘅CV係最好。將有用嘅Highlight,將唔太關事嘅拎走,呢個先係最人性化,例如喺Marketing嘅世界,有人做Event,有人做小編,有人做寫手,有人做數據分析,唔係一份CV可以包得晒。(That’s why 求職網站可以畀你Upload唔止一份CV)

 

7. 機會係留畀有準備嘅人

如果你係大學生,仲未畢業,可以試下搵下Intern拎下職場同埋心儀行業嘅資訊,做嘅嘢可能只係Filing或者搬搬抬抬,但你拎到嘅係做嘢嘅氣氛同行業概念。

如果你已經做咗幾年嘢,想喺事業上更進一步,你就需要參加多啲網上課程(例如而家喺Coursera而家出咗啲課程,好似Google Professional Certificates咁,用3-6個月時間就可以學到一個見得人嘅技能)同埋研討會,睇下業界需要啲咩技能,有咩新嘅發展,等你唔好Outdate。如果公司有Education allowance,千祈唔好放過,辛苦過後你會發現係值得嘅。

 

8. 準備面試

喺準備好你嘅CV之後,好快你會獲得見工面試嘅機會。預備做得好,過程都會順利啲輕鬆啲,最緊要係可以令到你個人無咁緊張,表現自如已經贏咗一半。打工仔可以上網睇下,或者問下相同行業嘅朋友,心儀職位嘅面試大概會問啲咩問題,亦都需要喺事前準備一啲過往嘅事例,去表達自己嘅能力,成就同埋經驗,從中展示你嘅優點。

另外有一樣嘢好少人講,就係留意你嘅肢體語言。肢體語言係畀人留低良好第一印象嘅重要工具,不妨做啲研究,對你會有幫助。

 

9. 面試之後都好重要

唔好怕麻煩。喺面試之後,嘗試Send封Thank you letter畀邀請你面試嘅公司,除咗出於禮貌,仲可以畀面試官見到你有幾上心,同時可以喺信入面Recap見工時嘅內容,等佢哋對你有更深嘅印象。另外,如果遲遲都無消息,可以Send一個Follow up email,睇下自己仲係咪有機會,有一個明確答案自己心理上會好過啲。

 

10.尋求協助

無人係咩都識,Google亦都未必100%幫到你,但如果你身邊嘅朋友同學前輩有相關Interview經驗,同佢哋傾計15分鐘,得到嘅資訊,一定好過你做一個鐘嘅Research。