Career Advice 名家分享

【職場航行日誌】見完工等offer無消息可以點?

主力做Recruitment嘅小熊,周不時都收到Candidate嘅Call問Interview完之後幾時有消息,係咪有無消息都會通知返之類嘅問題。喺公營機構和私人公司嘅做法係大不同,講下我而家機構嘅做法。

其實當Candidate嚟Interview嘅時候,我地都會有份Note事前比佢睇睇,講返一般佢比我地嘅個人資料會點處理,Promise只係作邊方面嘅用途,亦會寫明喺Interview完咗之後如果幾耐無通知嘅話就可以Assume係無被揀選,盡量一早就比多啲清晰指引個Candidate。不過好多時人地嚟In已經鬼咁緊張,仲邊會對之後嘅事咁上心呢。

有啲人好心急嘅,一走人就立即Send個Email嚟多謝所有見佢嘅Boss,幫過手嘅HR云云,出盡花言巧語,甚至會講下頭先邊Part答得唔係咁好,望多多見諒咁話。真係唔建議做呢啲多餘野,一來我地花時間睇你呢個Email唔知覆唔覆好,二來呢啲說話係咪應該喺Interview完結之前就講呢?而家再講都唔會改變到結果,只會帶到煩擾嘅感覺比人。

而私人公司呢?你做得太多可能印象會立即變差,覺得你咁只係無自信嘅表現。如果係小規模嘅公司,應該會直接Ignore呢個Email,因為佢地無咩嘅定嘅情序跟進,一個HR部門可能得兩至三人,內容又唔係希望佢地答到你啲咩正規問題,就無謂加重人地HR的工作量。

大概過咗一星期,想知有無消息,不如就光明正大打個電話或者簡單Send個Email禮貌地問。自己都係打工仔,好明白個個Candidate都心急想知道有無結果,隨時影響佢揀Offer嘅選擇或者有其他Planning嘅。所以打得嚟問我都一定會答佢究竟個呢個Post仲Process緊定係已經完結,等人地心裡都有個底嘛。不過假設問完個HR都依依哦哦答唔到你呢,就唔好逼迫人,先當住唔得啦。中間可能有好多事佢唔方便透露,可能老闆諗緊將你放唔放落Waitlist好,又或者有唔同嘅Team head爭緊你未傾掂數等,所以佢唔可以確切同到你講而家去到咩Status,呢個時候可以試下由被動變主動,講聲補個Email,希望有消息可以回覆返你。

我諗近呢幾年,多咗大公司會主動Send email比Candidate講今次佢係咪落入Waitlist或者無被揀選嘅情況,一來自己有個Record track到個Process去到邊,二來令Candidate對公司印象好啲,多謝佢嚟參與Interview,亦唔會好似擺款咁要人無了期咁等消息。呢個方法未必啱放喺要成日做Recruitment day嘅HR,因為人數太多了,所以事先聲明咗過幾多星期無通知就等於落選係要好重點提醒Candidate先得。希望少啲人再誤會HR高高在上擺姿態嘅形象,行多兩步比Candidates知道大家係Fair,會互相尊重。風水輪流轉,點知將來有無機會合作,對HR或者Candidate嘅態度都係好重要嘅Fill空缺職位或者係搵工指標。

 

 

圖:Shutterstock


以上文章刊於《招職》。