Career Advice 職業特搜

【行業內情】 喺香港教大專:人工有幾多?有冇淡旺季之分?學生難教嗎?

想教書,又唔想教中、小學,但學歷又未去到教授級數嘅,唔少都會考慮到大學嘅附屬學院或其他自資專上院校教下啲毅進、副學士或者高級文憑課程。不過究竟喺香港教大專好唔好做,呢行長遠又算唔算好景呢?作為一個過來人,等我喺到分享下少少心得啦。

點樣入行教大專
院校揀人嚟面試通常先睇求職者嘅學歷同教學經驗,而某啲學科如會計、護理、社工等亦會睇埋求職者嘅相關工作經驗同專業資格。見工時除咗筆試同面試之外,往往都須要試教一次俾班面試官睇,而試教題目一般都會早少少比定求職者準備。至於請唔請你,就視乎你嘅競爭對手同埋院校多唔多學生啦;不過要記住,學歷無人咁好唔代表你輸蝕咗㗎,有時啲老闆反而會擔心學歷太勁嘅求職者,好容易跳槽,所以有興趣嘅話,即管申請咗先,撞啱佢哋急需要人,話唔埋咁就請咗你!

教大專好唔好Pay?
呢樣嘢都係要睇你咩學歷,同埋教到啲咩課程。如果你嘅母校名氣夠大,又拎住個博士銜頭,教到啲相對高級嘅課程,人工可以由三、四萬或以上起跳。相反,如果你只係拎住普通碩士或學士學位,入到去啲院校由Assistant Lecturer嘅級別做起,起薪點一般都係兩、三萬左右,而當中大學附屬學院嘅出手又會比其他自資專上院校闊綽少少。當然,如果你本身已經有教學經驗,或者有教育文憑等其他資格嘅話,你嘅議價能力自然又會高啲。

Part-time教得唔得?
梗係得啦!事實上兼職教師喺香港大專院校界好吃香,尤其呢幾年收生人數唔穩定,有啲課程分分鐘去到8月尾、9月頭先知道開唔開得成,就算今年開到班,下年都可能會因為收生不足而摺埋,所以院校都幾鍾意請兼職教師,一來貪佢哋嘅人力資源成本較低,二來亦可以因應學生數目隨時增減人手。有院校淨係搞個兼職教師嘅聚餐都可以開到三、四十圍枱,可想而知兼職教師幾咁有市場,所以做唔成全職,又或者唔肯定自己適唔適合教書嘅話,做住兼職先都係一個唔錯嘅選擇。做得好嘅話,院校一有Full-time空缺就自然會比咗機會你先。至於人工方面,兼職教師嘅時薪大約由250至1,000元以上不等,視乎你教嘅係咩級數嘅課程。
 
可以淨係靠教兼職維生嗎?
大專界的確有為數唔少嘅人係「全職」周圍幫唔同院校教兼職嘅,不過呢類教師通常都會有幾個共通點:首先就係教嘅科目比較熱門,好似英文咁,又或者可以教到唔同嘅科目;其次就係溝通能力比較好,唔會引嚟學生投訴,又識得準時交到文件比Admin.同事嘅;仲有就係唔介意走走糴糴,可以去勻港、九、新界教唔同班嘅。

如果你建立到口碑,自自然然啲院校嘅課程主任就會樂意繼續搵你教兼職,你肯教埋夜校同周末嘅話,啲收入湊湊埋埋真係有機會等同甚至超過全職教師嘅人工㗎。不過要留意嘅係,呢啲兼職工係有淡季嘅,6月到8月日校學生放暑假,你都會因為咁而少咗好多教學工作,收入亦會因為咁而少咗。

教書之外仲有咩做?
上堂教書之外,當然仲有改功課、出卷、改卷、搞Marksheets、寫教材、帶學生活動同開例會等一大堆相關嘅工作啦。另外,呢幾年整體學生人數下跌,院校啲管理層都特別重視宣傳推廣,所以教師都要幫幫手諗計推廣間學校及課程,亦要參與策劃同出席唔同嘅招生活動。仲有一樣嘢係非常重要嘅,就係除咗「八大」旗下嘅附屬學院之外,其他自資專上院校嘅課程係須要交比香港學術及職業資歷評審局評審,而呢個評審過程係涉及大量文件往來,加上就算係過咗評審嘅課程,每隔幾年又要再嚟一次覆審,所以入得去教嘅都要預咗參與當中嘅工作。

大專學生難唔難教?
難!如果你仲停留喺學生必須尊師重道嘅年代,建議你入行前真係要三思,因為絕大部分嘅大專學生都唔太Buy呢套,上堂遲到、傾偈、打機、睇YouTube、瞓覺、抄功課呢啲算好小兒科,所以教佢哋真係要好有耐性,要肯以朋友嘅身分同佢哋溝通,如果呢個位拿捏得好,上堂氣氛就會好好多,甚至乎會得到啲教書嘅滿足感。不過如果你得罪班學生,佢哋輕則喺Sem尾嘅學生問卷到寫衰你,重則投訴、投訴、再投訴,就算你真係無錯都好,呢啲劣評同投訴都會加重其他同事嘅負擔,久而久之你只會予人唔識同學生相處嘅感覺,想有運行都難。

呢行有無前景?
香港現存嘅自資專上院校各有棒場客,不過如果你諗住入行長遠發展嘅話,就要考慮埋院校本身嘅Sustainability,好似大學嘅附屬學院通常都會因為大學本部嘅名氣而吸到多啲學生,而且喺營運上有大學本部做後盾,財政自然相對會無其他自資專上院校咁困難,入去打工感覺就可能會穩陣啲。

宏觀啲睇嘅話,頭先講過,大專院校嘅適齡學生數目呢幾年不斷咁跌,院校喺收生上係有啲阻滯,不過呢個跌勢預計喺2022年打後就回穩,所以長遠嚟講大專市場會繼續需要人才。有啲人會擔心,而家大部分新入行嘅教師都係同院校簽短期合約,每隔一、兩年就要Renew一次,咁會唔會好唔安全?老實講,呢類請人嘅模式喺好多行業都好普遍,唔係大專界獨有,要擔心都擔心唔嚟。睇返之前經濟較差嘅時候,大專界比起好多其他行業其實已經算係無咁大危機,而且香港嘅進修風氣旺盛,特區政府又一向重視專上教育嘅發展,所以呢行嘅前景點都唔會太差。

結語
雖然咁講係老套咗啲,但教得書嘅,你真係點都要有啲教學熱誠,如果唔係工作上會有好多嘢令你氣餒。正面咁睇,教大專最開心嘅,就係你身邊永遠都會有班青年人喺到,你既可以將自己嘅知識同人生經驗傳授比佢哋,又可以融入一下時下年輕人嘅世界,隨時仲可以喺佢哋身上得到啟發添。


文:Ray Leung