Career Advice Job seek in HK

【邊一個發明了見工?】拆解5大面試形式 11個小技巧幫你好好準備

《邊一個發明了返工》係一首廣東歌,同時係打工仔喺腦入面經常浮現嘅問題,但為咗生活,無計。但你又有無諗過,係「邊一個發明了見工」?答案係Thomas Edison,即係發明燈膽嗰個。喺1921年,Edison諗住請人喺佢間工廠做嘢,點知消息一出,就收到718個求職申請。為咗可以請到有知識而適合嘅人,佢設計咗一個有成146條問題嘅測驗畀大家,最後得32個人留得低。

 

101年之後,世界變化好大,見工面試亦演變出唔同形式,畀公司用嚟篩選同評估求職者適唔適合嗰個職位,亦可以從中了解:

  • 你點處理壓力?
  • 你點解決問題?
  • 你溝通能力係點?
  • 你嘅性格同公司文化夾唔夾?

 

今次同大家分享5個常見嘅面試形式,仲有一啲小技巧,睇下幫唔幫到你。

 

1. 篩選面試(Screening interview)

通常用電話進行,係用嚟確定申請人嘅經驗同學歷係咪合資格。HR會問下你嘅教育背景、工作經驗、同申請職位嘅動機。過咗呢一關先會有個正式嘅interview。

 

小技巧:

  • 事先做足功課:
    睇返招聘廣告有咩要求,公司背景係點。同時預備紙同筆,記低對方講嘅重點。
  • 搵個啱嘅位置:
    搵一個安靜而舒適嘅地方,愈少干擾愈好。

 

2. 虛擬面試(Virtual interview)

因為疫症大流行嘅關於,好多公司會利用Zoom、Google Meet或者Microsoft Teams等視像會議平台作為面試方式。雖然隔咗部電腦,但仍然係一個面對面交談嘅過程,招聘人員或者部門主管可以喺過程當中睇到你嘅對答同表情。

 

小技巧:

  • 確保器材穩定:
    無論你係用電腦定係電話,確保充好電,上網流暢正常,鏡頭清晰,speaker同mic運作無問題。
  • 搵個啱嘅位置:
    環境安靜,光線充足,背景整潔(或者用簡潔嘅virtual background),等面試官唔會分心留意其他嘢。
  • Keep professional:
    面試形式唔同,但都係formal interview,衣著必須得體。另外保持眼神交流(望cam),利用多啲身體語音。

 

3. 行為面試(Behavioral interview)

不論係面對面嘅面試,抑或係virtual interview都可能會有。呢個面試方式係畀僱主深入了解求職者過去嘅表現同成就。求職者必須用現實生活同真實例子作答,而成就必須係可以量化(quantify),所以你有需要擺定幾個例子落袋,去應對類似嘅問題。

 

小技巧:

  • 準備成功案例:
    Behavioral interview比較著重睇求職者有無領導能力,團隊合作有無問題、當有衝突或者突如其來嘅問題會點處理。提早做定功課,千祈唔好到時先諗。
  • 用STAR做回應:
    STAR即係Situation,Task, Action同Result,個情況係點?你需要做啲咩?你有咩回應?個結果係點?一個完整嘅故仔係可以吸引人嘅注意。

 

4. 小組面試(Panel interview)

呢度講嘅唔係同其他求職者一齊面試,而係公司由兩名或者多名職員會見你一個,如果你申請緊政府部門,金融機構或者高級管理職位,呢個面試方式係好常見。

面試入面可能有HR Manager,Department head或者其他未來嘅直屬經理。目的係想更加了解你嘅溝通方式,交際手腕同點處理壓力。幾個人對你一個,壓力係大啲,但當中你都可以知道公司嘅文化同結構係點。

 

小技巧:

  • 研究會見者背景:
    喺面試之前,HR會話定畀你知會見者嘅名同職位,你可以睇公司網站,或者Linkedin去了解佢哋,認人都會方便啲。
  • 準備好你嘅問題:
    喺面試嘅最後部份,佢哋都會問申請者仲有無咩問題想知,你問咩問題會影響你嘅印象,請好好預備。

 

5. 個案面試(Case interview)

同愛迪生嘅測驗好相似,公司會預備一啲個案同研究畀你,然後由你提出問題、論據同解決方法。目的係想藉住呢個過程,評估你嘅分析能力,邏輯推理同有無解決問題嘅創意。通常IT同工程行業比較會用到。

 

小技巧:

  • 研究個案同解決方法:
    公司提供嘅個案,會同佢哋做嘅項目或者想要嘅技能有關,可以喺網上搵下有無類似嘅case study,又或者睇下公司做開咩project,做定功課。
  • 問多啲問題:
    Case interview未必係筆試,而係即場做presentation,但個案未必有足夠嘅資料畀你回答,呢個時候你可以嘗試提出同個案相關嘅問題,令自己更加多資訊去做推論。

 

如果你想知道更多有見工有關嘅資訊,記得做CPjobs會員同Subscribe我哋嘅newsletter喇!