Appraisal每年都有，通常會同老細喺conference room你眼望我眼，傾下今年表現同未來大計，而呢一刻就係同老細講加人工最理想嘅時間。講就易，點講先至得㗎？太過aggressive又會嚇親老細（「你唔加我人工我就即刻遞信！」），太過鵪鶉最後又會不了了之（「係呀想加人工呀，不過睇你啦，講下啫。」），點先好？以下有8個「唔好」，一定要注意！

1. 唔好自己開口講加幾多

最重要所以擺喺第一位，千祈唔好由自己開口講要加幾多人工。提出加薪要求係可以，但首先你要了解老細嘅諗法，探聽佢覺得你值幾多，先有談判嘅空間。提出要求，等對方回應開出一個價，再睇自己接唔接受啦。

2. 唔好講到明自己準備跳槽

好多人會同老細明示暗示自己出面好多offer，又話有朋友搵自己過去幫手點點點，唔好啦。你以為用其他公司嘅offer做籌碼，可以喺而家呢度換到個更好嘅人工咩？少年你太輕喇，咁樣即係同公司講:「我無心喺度做㗎喇，想留我？畀錢吖。」雖然係事實... 但唔需要講到咁白。不過，你都可以講下其他公司，你呢個職位係幾多人工，等對方都有個參考（CPjobs都有個薪酬水平可以睇下！）

3. 唔好同其他同事比較

喺公司同同事比較真係在所難免。雖然而家呢個年代，人工都未必係秘密，但知係一件事，講出口又係另一件事。就算你哋係同一個department，同一個職位，skill set同年資都未必一樣，其他「憑咩」得到呢份糧，都係得老細知，同你無咩關係。

4. 唔好講到自己天上有地下無

有自信係好，不過唔好過份囂張（除非你一個人揹住公司90% profit啦），講到自己點勁點勁，公司無咗你唔得等等，老細只會覺得你乞人憎，自我中心不求上進。Appraisal同作文差唔多，無標準答案亦唔會拎到滿分，永遠都有進步空間。老實報告自己成績係點，表示自己應該有更好嘅待遇就可以喇（但如果你都係吹水就另計)。

5. 唔好將個人需要成為加薪理由

人生好多計劃，而呢啲計劃需要錢，可能你要結婚生仔買樓租樓交學費，支出同收入就好似十個煲九個蓋咁，但公司唔係開善堂，對於公司嚟講，你加人工係同「工作量」，「工作能力」，「業績」同「公司賺唔賺到錢」掛鉤。私人嘢就擺埋一邊啦。

6. 唔好say sorry

香港人有禮貌嘛，唔該前唔該後，sorry前sorry後好正常。「Sorry，我想要求加人工。」傻的嗎？有咩原因要say sorry？要求加人工係無錯㗎，你亦都無對老細唔住。對於公司嚟講，勞資雙方係交易關係，你付出知識勞力，佢付出金錢，你想加人工都係因為覺得自己工作同人工唔成正比啫？咁講咩sorry令到自己低一級。

7. 唔好獅子開大口

一講人工，個心理就係先開大個頭再等對方壓價（因為預咗會壓），但記住要合理。要求人工之前，必須做足功課，知道自己嘅市場價值同埋出面嘅人工走勢，再睇返自己嘅年資，定出最合理嘅升幅。

8. 唔好「老實講」

「老實講」，英文「To be honest」，通常之後都係講真話同埋唔慌好嘢（即係講完no offense，跟住嘅內容都係offensive咁），真話唔係個個都受得住，聽嗰個更加可能覺得反感，嘗試用一個比較淡定，帶少啲個人情感嘅方式去表達，例如：「我希望反映一下而家呢個情況」

記住呢 8 個唔好，同老細傾之前做足功課，希望大家都加薪成功！