桃子小姐今年廿七歲，做過三份工，
呢一日係桃子小姐第N次返工遲到，
桃子小姐心知不妙，佢乖乖地準備入房叩頭認錯，入房前幾十秒，
呀姐首先「唉」咗一氣，然後語重心長咁同桃子小姐講：「我知你一直有遲到嘅習慣，我有冇咩幫到你？」
桃子小姐唔係幾相信自己嘅耳朵， 以前每個老細都不停同佢訓話，但呀姐竟然冇！佢唯有老老實實講出嚟。
「其實我自己都唔知點解，我好早起身，但起身之後食完早餐化埋粧就發現已經遲咗出門口。」
呢個理由雖然好難令人信服，不過如果大家身邊都有一兩個遲到狂魔，就會明白遲到嘅人就係咁。呢個係一個壞習慣，可以係冇原因。 呀姐都好明白呢個道理，冇可能一時三刻 改變一個壞習慣，就算鬧完佢，好快又會再犯。所以決定監察住佢，畀時間桃子小姐慢慢改善。
對時間冇感覺
桃子小姐患嘅係無定向遲到症，佢地大多對時間缺乏一種感覺，往往喺唔睇鐘嘅情況下，都感覺唔到時間過咗幾耐。一個鐘都當兩個鐘嚟洗，望一望鐘已經發現自己太遲。
除咗桃子小姐呢種之外，習慣遲到嘅人仲有幾種遲到嘅原因：
動作特別慢
香港人生活節奏急促，如果要比較人類對腳嘅進化速度，香港人一定係進化得最快。不過，唔知你有冇見過有啲人動作天生比較慢，如果你個人比較心急，望住佢一定炆到爆。由於佢地動作慢，送車尾嘅情況經常出現，遲到在所難免。
決定困難症
去買嘢嘅時候三心兩意，做一個決定要列出十個原因先可以說服到自己嘅人，一樣係遲到嘅高危一族。返工今日化個咩粧好呢？著邊隻色嘅衫好？最後要攪到決定搭的士好唔好。
最後一刻先做
雖然明知朝早時間趕，但所有嘢都要留到最後一刻先做。一起身見有時間就上下網先，上上下先發現夠鐘出門口，到時先換衫就已經太遲了。
