打咗工咁耐，其實最欽敬嘅人唔係老細，而係我成日尊稱佢哋做「伴虎」嘅秘書們。正所謂「伴君如伴虎」，每日喺老細身邊湊住佢，秘書其實雖然冇權，但係無論係能力同埋Power其實都非同小可。

佢地除咗要將老細每日要處理嘅工作安排得井井有條之外，又要識得幫老細解圍，包括要將所有未去到老細枱面之前嘅嘢都要睇得一清二楚，篩選過後先至會Pass上去。試問呢個商業社會又有幾多個李皓鑭呢？

所以有時候打工仔氹得啲秘書開心，喺公司真係都幾有用。佢哋會無意中提水，話你知老細想要啲咩、老細心情唔好又預先發出警報。要同老細申請啲嘢嘅時候，同秘書小姐講聲等佢識得揀啱時間將你嘅申請先遞入去，咁樣就可以捷足先登。

正所謂「寧得罪小人，莫得罪秘書」，如果你真係唔覺意得罪咗佢哋，你就真係冇運行啦！只要佢同老細講兩句你嘅壞話，你之後喺公司真係無運行啦。我真係試過之前衰多口得罪咗秘書小姐，後嚟當老細同啲Director開會諗緊升邊個嘅時候，秘書小姐就喺老細面前打毒針話我有乜乜乜唔好。最後當然係名落孫山啦，但係其餘嘅候選人做嘢又唔叻，但係就最叻氹秘書開心，咁就唔同晒啦！我又點會知？咪就係我同Director啲秘書相熟，只可借佢哋只係貴人而唔係貴妃、妃、嬪呢啲Level。

不過熟還熟，喺大公司想有發展機會，唔可以淨係靠同啲秘書小姐稔熟，因為始終都係要靠自己實力，而且喺大公司入邊，唔同老闆嘅秘書就好似宮廷劇嘅橋段咁，分分鐘互相暗地鬥爭，有時你真係唔知邊個上緊位邊個跌緊落嚟，一旦靠錯邊，自己都會跌埋一份！

以上文章刊於《招職》。

Select article category

Search Article

Tag: 伴君如伴虎

【職場盧騷王】 莫得罪秘書

【職場盧騷王】莫得罪秘書