最近農曆新年假期，因為電視台重播關係，睇咗一套2016年嘅愛情電影 —— 《Me before You》，不過令我最深刻嘅唔係條愛情線，而係「人只能活一次」呢句普通對白。

呢套電影由因為《Game of Thrones》而大紅嘅龍之母Emilia Clarke主演，男主角係《飢餓遊戲》入面飾演靚仔配角Finnick嘅Sam Claflin。( 下有劇透 ) 故事內容講Sam Claflin主演嘅Will本身係一名運動健將，經常周圍去旅行見識，又有錢又靚仔，不過因為一場車禍令佢全身癱瘓。癱瘓後，前女友離棄佢，後尾仲嫁埋比Will個老友。佢嘅人生變得極灰暗，但因為遇上被佢呀媽請嚟照顧佢嘅Lou而慢慢變得開朗。

而Lou只係一個平民女子，因為老豆失業而要放棄自己嘅夢想去搵工。佢嚟照顧Will都係為咗份糧，但喺過程中，佢無意中發現原來Will早已經決定咗接受安樂死，Lou希望利用佢地相處嘅剩餘時間，令佢改變主意。因為係愛情片關係，少不免喺過程中雙方會互生情愫，Lou甚至狠飛拍拖7年，一直非常自我中心嘅前男友。不過，呢套戲結局唔係一齊BBQ跳起Yeah，最後Will並冇改變主意，縱使佢地互相都鍾意大家，但Will依舊決定要接受安樂死，因為呢個並唔係佢想過嘅人生。

呢套戲入面最吸引我嘅地方唔係呢條有遺憾又催淚嘅感情線，而係最終Will對Lou造成嘅改變。Lou一心想改變Will嘅安樂死意願，但最後反而被Will改變咗自己嘅人生。

喺戲入面有幾場戲係講Will問Lou嘅過去，想了解下Lou係個咩人。Lou同好多人一樣，生活就係每日返工等放工，返屋企食飯第二日再返工。而且Lou係一個習慣為人犧牲嘅人，老豆失業，細妹話要讀書，於是自己出嚟做嘢橕頭家；自己幾唔鍾意踩單車都成日踩單陪住鍾意跑步嘅男朋友；平時咩都唔敢試，唔會去旅行；自己鐘意Fashion又冇膽去追求夢想。

Will失去咗自己想過嘅人生，佢唔想Lou喺仲有得選擇嘅情況下過住妥協嘅人生，所以不停鼓勵Lou去改變。Will喺其中一場戲就同Lou講：「人只能夠活一次」，鼓勵佢勇敢追求自己嘅人生。喺現實生活中，其實好多人都係一樣，明明四肢健全、有得選擇，但都甘願放棄自己嘅人生，為份糧而妥協、為別人嘅夢想工作、為別人而改變自己、放棄自己嘅夢想、過住每日唔想返工嘅人生。事實上，時間好寶貴，「人只能夠活一次」，咁落去你真係甘心咩？點解唔嘗試活出自己嘅人生？如果你一直已經有改變嘅念頭，希望你唔好再遲疑，今年可以勇敢行動！

Select article category

Search Article

Tag: 安樂死

人只能活一次