打工仔可以點樣慳水慳力做野達到最高效率？當然係精人出口，笨人出手啦！而精人是如何鍊成的？首先你要識得人多，而呢班人要係身懷絕技各有所長嘅。此外亦唔少得要有油腔滑調，識得討人歡心加埋厚一厚嘅面皮，淨係利用把口已經事半功倍。

近排因為馬浚偉喺節目講過曾飾演《鹿鼎記》中嘅康熙一角，男友一時興起就同小熊一齊重溫舊劇，明明想睇番當年嘅康熙幾咁俊俏，點知睇唔夠半集已經俾佢身邊嘅大紅人韋小寶迅速轉移咗我地視線。呢隻聰明又詭計多端嘅小鬼，好識得捉人心理，明知佢經常信口開河無嚟正經，但每次緊急關頭又可以有方法逢凶化吉，不知不覺產生咗一種魅力令人信服佢講嘅說話。

我地部門出咗名有位生得標緻嘅甜姐兒Apple，雖然年過三十又濃妝艷抹，不過佢喺處理人際關方面的確訓練有素。「Peter哥哥，我部Printer唔知點解成日Jam晒紙，你電腦咁叻，麻煩你過嚟幫我睇下啊！」其實電腦叻同整Printer根本係兩回事，只係聽到有同事咁低聲下氣「哀求」你，引導你嘅虛榮心浮面，咁搞法唔出手點得呢！Peter好簡單咁打開內籠睇下，清番入面塞住嘅紙，部機就Run得番。Apple作狀細細力拍手掌，仲加句「唉啊，你話無咗你點算啊！」邊講邊順手拎左包隔離部門阿邊個嘅旅行手信請Peter食！Peter不以為意，仲覺得咁小意思有人讚又有小禮物收，笑笑口返埋位！

就算佢同你幾唔熟都好，佢總會喺三兩個月內安排到一大班人包括你食個Lunch，天南地北咩話題都傾到。又會突然追問你最近嘅狀況，無論公事、感情定係是非上，聽著佢親切關心嘅聲線，加上群眾一致等待你回答嘅眼神，無咩抵抗力嘅人係好容易和盤托出，唔小心洩漏風聲。能幹嘅天文台將接收番黎嘅消息，整理好後當然用嚟做話題轉告俾老闆知。嗱……唔係老闆八卦問架，係佢「關心」同事轉達下佢地嘅諗法同意見啫，咁襟撈實會被加以重用，同時又唔覺意顯出佢同同事打好晒關係，一舉幾得！

人事部「做騷」嘅機會多的是，喺老闆眼中，在重要關頭「攞到人」等同獨力主持咗個招聘日一樣咁大挑戰。每次安排活動都希望可以平均地得到每個部門嘅參與，不過根據過往經驗，十次有九次都係靠我地啲同事打人情牌邀請返嚟。Apple一開頭係唔會主動插手，用順風耳留意住事情嘅動向，知道老闆想要啲咩人就開始暗地裡鎖定Target，邊個Talk得玩得，邊個演奏樂器唱歌叻，邊個做手工佈置叻，心裡有數。然後等老闆無晒計頭都痕埋好慌張周圍搵同事幫手嘅時候，Apple就會出擊！佢會口甜舌滑咁說服啲同事仔參加，就好似啲跑數嘅保險經理咁，落足嘴頭講到佢地趁機會俾人認識下係對自己前途幾咁著數，考升級試印象分都高啲。每成功搞掂一單，老闆對佢嘅好感就加一分，當佢做到Top sales個陣，紅人地位就更穩固。

一個精人，只要靠把嘴同埋平時夠眉精眼企，喺有需要嘅時候將人地嘅技能發揮到出嚟，解決老闆嘅煩惱。識得用呢招借花敬佛，你就自自然漁人得利！

圖：Shutterstock

以上文章刊於《招職》。

Career Advice Career counselling, advice and guidance Select article category Select article category Workplace EnglishJob Search in Hong KongProductivity TipsHR Career SuccessIndustry StoriesHow to Get PromotedCareer Personality TestsCareer Path PlanningCareer Coaching & GuidanceAdvice Columnist

Select article category

Search Article

Tag: 老闆加分

【職場航行日誌】搏老闆加分要識借花敬佛