仲要出現幾多呢啲打工仔悲歌？見到一篇令人心酸嘅新聞，明明一個勤奮又有大把前途嘅半工讀女生，諗都諗唔到咁後生會因工作過勞就被取去性命。工時過長，搵到錢都無心情無時間無生命去享受，當返工變成一個黑洞，吸走晒你啲正能量，身邊嘅人都發現你整個人充斥著苦不堪言嘅黑氣，咁樣過活有咩意思？

標準工時必定要立法，唔好等到更多人做到死，社會先去思考係咪有問題！人心肉做，要個員工瘋狂加班唔會心痛咩？好了，終於Get the job done，對得住老闆同事，但呢位好員工亦奉上自己最後一口氣。

唔少一畢業就急住出嚟打工嘅朋友，為咗盡快儲多啲錢，可能想減輕屋企經濟負擔、賺學費繼續進修、買車買樓又或者想達成自己嘅夢想，佢地可以堅持到一個點係Grad trip唔去，每日唔係帶飯就係捱麵包，總之慳得一蚊得一蚊。做第一份工，樣樣野未識拿揑，又怕會因小事得罪上司同事，唔覺意變咗Yes man，對要求長期加班或Over workload，心有不忿但唔知點開口婉拒，以為做多啲人地對自己印象點都好啲。可惜多數換嚟嘅係人地得寸進尺使得你更盡，你愈嚟愈疲憊，放假想躲喺屋企Hea同訓多過見朋友。後生仔本來有嘅無窮精力同活力都被磨蝕晒。喺公司輪住做同事嘅跑腿無發揮機會，一啖啖嘅怨氣吞晒落肚，同死黨呻完，第二朝又要死死氣返去捱。

人生經驗係可以累積返嚟，但唔係個個咁好彩遇到個好嘅Senior同事或者前輩，過一式半招點拆解職場陷阱，一唔小心就會走入死胡同。近年出現愈嚟愈多年輕人和打工仔抵受唔住沉重嘅壓力而自殺嘅個案，社會上有啲咩政策實際幫到佢地？唔見得有，即使有公司提供心理輔導，但我諗你同我都會覺得承認自己有病，咪等於表示工作能力有問題？為怕其他人閒言閒語就收埋唔俾人知，負面情緒可能不知不覺向身邊人爆發。

喺未全身投入職場之前可以做啲咩打定個底呢？就係讀書時期搵兼職做吓，嘆住冷氣嘅文職工如果係Data entry之類自己一個對住電腦學到嘅野最少，想挑戰自己就要做多啲對客人嘅工種，例如Sales、侍應同活動搞手等，練下個膽同應對技巧。做細嘅食吓死貓，雞手鴨腳做錯野，死忍客人嘅無理取鬧呢啲係等閒事。你會逐漸意識到喺人前唔可以交晒個心出嚟，係要建立一個形象令人信任你嘅能力，同埋要Keep到平穩嘅情緒去處理突發情況。唔好事無大小騰晒雞求人幫手，亦要對無理要求Say no！兼職的好處係當你真係頂唔順啲人事或者想轉份人工高啲嘅工個陣可以隨時拜拜佢條尾，而全職就算你遞咗信，喺解脫前一日都依然好考耐性，要成熟啲按捺住脾氣，表面上好嚟好去。

由細到大，從來無諗過係香港會有人「過勞死」。錢，庫房無咩？點解見住土生土長嘅香港人生活愈來愈苦，過長工時搞到身體負荷唔到都唔積極保障佢地？做專業人士嘅就壓力過大，基層嘅每日耗盡勞力，但連最基本嘅食和住都滿足唔到，下一代點樣脫離貧窮線。香港人嘅快樂指數每況愈下，憂心嘅事無限Loop，出路暫時只可以靠自己盲摸摸行出嚟。

圖：Shutterstock

以上文章刊於《招職》。

Career Advice Career counselling, advice and guidance Select article category Select article category Workplace EnglishJob Search in Hong KongProductivity TipsHR Career SuccessIndustry StoriesHow to Get PromotedCareer Personality TestsCareer Path PlanningCareer Coaching & GuidanceAdvice Columnist

Select article category

Search Article

Tag: 金錢奴隸

【職場航行日誌】金錢奴隸唔想做有乜出路