「Food is medicine！不時不食，食得適宜，才會健康。」韋小東 ( Tom ) 穿着燙得筆直的廚師服，自豪地說。

銀行精英少年反叛拒絕子承父業
Tom是中泰混血兒，出生泰皇御廚世家，從小接觸餐飲業。年少的他不想受困於「做廚」的命運，於是在新加坡國立大學和清邁大學修畢經濟學和資訊科技學位，決意成為西裝筆挺的金融人。「父母、哥哥同其他親戚都係廚師，所以我當時好渴望揀份完全相反的工作！後來辭職想去歐洲遊歷，剛回復自由身，在香港開餐廳的家人就叫我來港幫手，就係咁，最終都係入咗行。」

自此Tom再沒有回到金融業，與「理想職業」愈行愈遠，有後悔嗎？「哈哈，冇喎，雖然最初好抗拒，愁眉苦臉足兩年，但入廚似乎真係家族天性，兩年後我開始變得投入，愈來愈享受下廚。」他豪邁地回答：「以前皇帝有御醫，都有御廚啦，廚師工作係任重道遠。」

足跡遍佈廣亦廚亦醫傳揚飲食之道
發掘出對廚藝的興趣，Tom展現過人的努力和天份，建立起穩步上揚的廚師之路。現在任職香港黃金海岸酒店行政主廚的他，曾擔任多間酒店的行政總廚、自立門戶經營泰式餐廳Thai Na，更曾為各地不同食肆提供顧問服務，設計別出心裁的餐單。「顧問工作好有挑戰性，要了解該餐廳的理念，知道他們想達致甚麼目標，才能設計出最配合的餐單。」

Tom笑指，與開餐廳的工作性質不同，擔當行政總廚總是有好多會議要開，也有繁複的文書工作。「真正可以下廚的機會其實少咗，更多係指導和教育同事怎樣看待煮食這回事，以及思考點樣向食客傳遞飲食之道。譬如說近年好多人去食自助餐專攻龍蝦生蠔，覺得一定要食夠本先抵，但咁樣食嘢，算唔算享受到用餐過程？又係咪真係健康呢？」

「我下廚，最大的滿足感就係有人享受我煮的菜式，料理唔單止要好食，亦要健康，兩件事係相輔相成。」食物即食療，Tom對飲食的堅持，令他一路窮究鑽研各地飲食文化，精進廚藝技術，務求將最時令的味道帶到客人舌尖。他更會使用酒店內自家種植香草蔬果，甚至施展巧手將超級食物紅菜頭化為精緻壽司，為酒店餐單注入新鮮感。

廚藝勤中練用心才可贏取客人回頭
「知識可以學，廚藝可以練，擺盤可以變，但如果唔用心煮，一定唔會成功。」點先為之成功？「有回頭客，市面咁多選擇，吸引到客人再來幫襯，便是成功。」

香港租金高昂，經營食肆有一定難度，在這裏開過餐廳的Tom直言，未來Casual dining會比Fine dining更受歡迎。「餐廳要有自己理念，再配合環境，就做到百花齊放。」那麼想入行的人要考慮甚麼？「做廚工時長，一定辛苦，仲要眼觀四面，耳聽八方，煮前要有計劃，煮完要聆聽食客意見。廚師可以令人食得時令，活得健康，其實點只係份工咁簡單。」

文：Jie Leung
圖：Fox Woo

Career Advice Career counselling, advice and guidance Select article category Select article category Workplace EnglishJob Search in Hong KongProductivity TipsHR Career SuccessIndustry StoriesHow to Get PromotedCareer Personality TestsCareer Path PlanningCareer Coaching & GuidanceAdvice Columnist

Select article category

Search Article

Tag: 香港黃金海岸酒店

御廚的飲食哲學：下廚唔簡單