記得有人問過，HR面試經驗多，自己去見工係咪一定唔會緊張、一定會特別叻？ 其實HR都係一個普通打工仔，面試一樣會緊張、一樣會被人寸、一樣會遇到惡頂面試官，所以其實好明白一般打工仔面試時嘅感受。只不過因為做得多，知道佢做咩要咁樣問，對面試官唔會有太大嘅「Hard feeling」。

出於對面試嘅恐懼，或因為曾經有過唔好嘅面試經歷，部分人會將面試無限妖魔化，每次都覺得會被人針對、面試官一定係衰人等。咁嘅諗法對面試本身其實冇乜好處，雖然我地唔係每次都咁好彩，遇到好Nice嘅面試官，但唔代表個個面試官都係妖魔。呢度有個真實例子，面試無論成功與否，其實都可以有好嘅體驗。

琪琪小姐本身做咗客戶服務好幾年，修練得一身好EQ，被黑面都唔會叫人吃蕉。但係佢一直都好清楚自己有一個弱點，就係英文講得唔夠好。雖然佢有苦心修練，但一直進步唔太大。因為對自己嘅英文信心唔夠，所以一直都好怕去Interview。不過因為已經喺呢間公司做咗幾年，為咗吸收更多經驗，佢覺得自己一定要跳出而家呢個Comfort zone。而首先，佢必須要克服對英語面試嘅恐懼。

為咗Interview，佢搵英文老師鍛鍊咗一陣，終於有一日有間大機構叫佢去見工。去到Interview當日，琪琪小姐非常緊張，不過當佢入到房嘅時候，見到個Interviewer非常有善，首先放心咗少少。喺Interview嘅過程當中，琪琪小姐同Interviewer有講有笑，不過講英文就始終唔順暢，琪琪小姐諗住面試應該就咁燒焦。點知去到面試嘅尾聲，Interviewer竟然友善咁主動轉用中文同佢傾計。

「琪琪小姐，我地呢份工因為要經常面對外國人，所以好注重英文發音。你嘅發音雖然有改善嘅空間，但我睇到你對份工嘅熱誠，一陣我地會有一個英文嘅測驗，你一定要加油！」

「另外，頭先你答問題嘅方法都有改善嘅空間，例如你咁樣咁樣答就會更加好。」

琪琪小姐表示未試過見過Interviewer見完工會比返意見自己，就算見唔成，今次都學到好多嘢。幸運地，琪琪小姐過幾日就收到電話，成功被取錄。

呢位Interviewer本身其實冇必要花額外時間同琪琪小姐傾計。如果琪琪小姐先入為主妖魔化咗個Interviewer，佢可能就會覺得對方係喺度教訓緊佢。其實Interviewer唔係個個都咁乞人憎，一定要寸你寸鑊金。今時今日作為HR都要好好學習，留個好印象 、好體驗比你嘅求職者，其實等於幫你公司賣緊廣告，建立緊一個好嘅僱主形象。相反，你就係幫公司倒緊米了。