呢日嚟見工嘅係一位年輕人，佢叫呀才，喺一間大型會計師樓入面做核數，已經貢獻咗自己好幾年嘅青春，今次申請咗薯仔公司一個會計職位。今日個面試係joint interview，由我同另一位部門嘅代表May姐負責接見呀才。May姐喺社會都打滾咗好一段日子，係年資比較高嘅一輩。

呀才嘅履歷入面比較特別嘅地方就係佢已經辭咗職，喺而家間公司做埋最後一個月就可以離開。呀才講到自己已經辭咗職，好似撻著咗May姐個制咁。

May姐：「點解你咁快辭咗職呀？未搵到工做咩辭職呀？」

呀才：「係呀，因為自己都決定咗嚟到呢個階段需要有一個改變，由核數轉做內部會計，所以決定辭職後再慢慢搵另一份工。」

May姐：「咁可能你未必咁快搵到喎，中間咪會有空白期冇嘢做？」

呀才：「如果未搵到嘢做，我會畀自己休息一下，空窗期同時利用空餘時間去進修，學下其他嘢。」

May姐聽完呀才講休息，塊面好似有陣黑氣湧出嚟，好明顯唔係好滿意。當做完咗個面試之後，不出所料，May姐最關心佢辭咗職呢個問題。

「佢辭咗職先搵工，好似唔休做咁喎，做做下唔鍾意又走。唉～而家啲後生⋯」

無可否認，而家年輕一代嘅生活條件好咗，好多時都未至於手停口停，所以辭咗職都唔會咁快死。不過對May姐呢代人嚟講，「唔做嘢唔得」呢個諗法似終都比較根深蒂固。

其實辭咗職休息下，慢慢再搵工又有咩問題？只要有儲蓄嘅習慣，依然可以自己照顧到自己。而且正所謂休息係為了走遠嘅路，辭咗職嘅空白期仲有好多嘢可以做。

去working holiday/去旅行

好多人覺得去旅行/去working holiday即係去玩啦，其實去旅行除咗玩之外都可以學到好多嘢。我見過去完working holiday返嚟嘅朋友，待人接物嘅能力強咗、溝通能力好咗、自信心大咗。呢啲都可以係去working holiday嘅得著。

陪伴珍惜嘅人

香港人工作生活嘅忙錄程度可謂世界聞名，好似呀才咁，工時超長，平時返工十分缺乏陪伴家人嘅時間。好好利用空白期陪下自己屋企人，齊齊整整坐埋一齊食飯，呢啲用錢都買唔到。成世流流長仲有排做，點解唔可以喺適當嘅時候畀自己休息下，分配返啲時間畀重要嘅人？

去讀書進修

為自己增值和持續進修永遠係最好嘅投資，利用空白期學自己有興趣嘅嘢，或者考下其他專業資格、進修語言，絕對係自己未來鋪路嘅好選擇。就算面試畀人問起，你都可以證明到你冇浪費呢段珍貴嘅空白期。

給自己新嘗試

俗語有云：「做嗰行厭嗰行」，當做同一份工作一段長時間，新鮮感會消失或感覺走到瓶頸位置。其實我工作可以有好多選擇，做死一行對自己都未必係好事。趁空白期冇其他嘢兼顧，思考下新方向，畀自己個機會試下新嘢啦。