【職業特搜】手機程式╱網頁開發員 學多幾瓣最著數 | cpjobs
Home > Career Advice > 職業特搜 > 【職業特搜】手機程式╱網頁開發員 學多幾瓣最著數

【職業特搜】手機程式╱網頁開發員 學多幾瓣最著數

Published on Tuesday, 09 Oct 2018

背景︰Joseph — 入行約五年,公司規模屬中等,手機程式及網頁開發都有涉獵。

人工及晉升機會
如果係大學畢業,入職通通由14,000元開始;如果係專上學院畢業,最初會比大學畢業生低1,000至2,000元,不過有碩士學位又唔會特別高人工。呢個職業入場門檻不高,重實戰經驗,所以有人入行時人工高,係因為讀書時已經有做Freelance寫過網頁,未正式投身社會已經有經驗。

加薪升幅每次十幾%,過多四、五年去到年資較深嘅位,淨係做手機程式嘅可以去到20,000元,之後加薪開始放緩。由於網頁範疇多啲,有機會人工去到25,000至28,000元。
壓力指標
新人嘅壓力都幾高,因為工作成日都好趕,Delay係理所當然,因為客人以為叫我哋改好少野,應該好快,但行內人就知,件事係好繁瑣嘅。簡單如Facebook本身註冊只係輸入First Name同埋Last Name,如果突然要加Middle Name就煩,因為原本無設定呢個位,依家就要重新建構成個程式;若然最初系統分析 ( System Analysis ) 設計做得好差,改嘢就更要花時間。

網頁就唔同,如果只係改幾粒字,可以好快搞掂,有時佢哋半夜見到漏洞 ( Bug ),於是個客會凌晨3、4點搵你。但做多幾年就發現,無可能有一隻程式係無漏洞,識咁諗壓力又會低啲。最常見係,程式有新功能出街,客見到有漏洞,就會即刻搵我;如果個新功能係星期五臨放工先出街,可能夜晚10點仲有嘢改,就會OT到好夜。
增值指標
設計 ( Design ) 係另一個部門,有人會學埋,可以食埋人地個瓣。更上一層樓可以做系統分析師 ( System Analyst ),所以有人研究系統或者係大數據。有心做更高位,要預咗第時要做大規模項目,隨時有三、四十人合作及分工,所以要學習點樣將各樣工作融合成為整體,唔係自己勁就得。

做呢行成日都踩過界,例如做開網頁,會踩埋去手機程式,調轉都有。網頁開發員多數都會寫埋手機網頁,因為好多手機網頁只係用手機睇電腦網頁,例如某公共交通工作嘅程式,我估計都係由PhoneGap ( 以HTML5網頁技術建立手機程式 ) 拆出嚟。我公司有手機程式開發員,唔夠人手時,我都會客串吓。不過較少手機程式開發員過嚟幫手做網頁,因為手機程式嘅部分技巧應用唔到去網頁。

所以,入行先做網頁係著數啲,好少純粹整手機程式;不過喺香港要搵寫手機程式嘅高層次人才就比較難。
 
問:做手機程式 / 網頁開發員要有乜野入職要求?
 
答:呢行講實際,如果入行前已經有做Freelacne或其他相關經驗會吃香好多,單純睇學歷嘅話,大專及大學程度就得;大專畢業人工係較低,但入職機率高,因為佢哋實戰能力高。但高職位就會揀大學生,呢個階層需要更多理論層面,先可以建構大嘅系統。喺大學選科,揀電腦科學 ( Computer Science ) 已經夠,或者係曾經讀過與電腦有關嘅科目。
 
問:面試會問乜?
 
答:雖然都會問應徵者對創作睇法,又或對Social Media生態有幾了解。但這位置始終係管理人,面試會花更多時間了解你對管理下屬的看法及經驗。另一焦點「話題」係你湊客的經驗及技巧,最好數到經自己手吸納有幾多勁客,並提出一些有效解決客戶疑難的實際個案,當然更重要係講解一下自己發掘新客的經驗,清晰地呈現自己的身價
 
問:面試時會唔會要求即場寫程式?
 
答:都有機會,如果你係剛畢業,唔知你有無料,就會咁樣要求。另外都會好直接問你有咩經驗及知識,可以同時處理幾多項目,都幾睇重Multitasking ( 同時處理多項工作 ) 技巧,我試過同一時間做三十幾個,不過唔使驚,新人通常只須幫手維持程式或網頁運作。

面試官都會問有無獨立工作能力,特別係細公司,多數無足夠人手。此外一定問識幾多語言,講嘅係電腦編程語言 ( Programming Language ),仲有學過咩工具?可以分網頁同埋手機,或者Android定IOS,識幾多款工具以及熟唔熟等?技能愈多,愈直接同人工掛勾。不過電腦工具有好多類型,唔識唔緊要,但你學過嘅嘢愈多,老闆會認為你有能力學習更多工具。
 
問:平時返工係咪寫程式同埋網頁就得?
 
答:簡單講吓返工有咩做先,如果係手機程式開發員,多數由設計師畀設計圖,我哋負責由零到有咁做出嚟。香港好少純粹嘅網頁開發員,首先會搵位寫手撰寫網頁內容,再由我哋放喺網頁。有時要砌埋插圖、排版,再做字型及顏色。其實我地都要同客人溝通,跟住再講。
 
問:點先叫做達成工作指標?
 
答:做完項目,客會唔會好快搵到漏洞或者搵唔到,已經達標;就算有漏洞,如果係避免唔到嘅,或者係一個好罕見嘅漏洞,都唔太大問題,但犯基本錯誤就唔好喇。準時好重要,雖然工作性質令我地開工實遲,但預計10日完成嘅工作中,你第四日發現問題,知道唔夠時間做,就要識得搵幫手或者其他方法處理,咁樣老闆同客都會較易理解。

如果係外國公司,好睇重編碼 ( Code ) 寫得靚唔靚;如果一個程式由幾個人寫,就要格式統一,簡單到括號後即刻打字,抑或隔一隔先有字,若然唔統一可以影響好大;例如「I’m a boy」,但「‘」打錯做「“」,就會搜索唔到出嚟。此外香港好多網頁或者官方網頁都係無障礙網頁 ( WCAG ),方便傷殘人士瀏覽,一早學識就能夠工作時易啲做到。

我哋經常同一時間對住幾個客,所以要識同客人傾掂數,分先後緩急。
 
問:使唔使跟其他同事合作?定係單打獨鬥就得?
 
答:一定要面對同事,特別係有大單嘢,須要幾個人合作,咁就無可迴避,有時都要見客。我哋最常合作係設計部門,要將佢哋思考出來嘅嘢數碼化。網頁就要搵寫手,都要同佢地聯繫;因為有網頁係中英、繁簡對照或者其他語言,唔係直接「啪」堆字入去就得,而係要同寫手傾。假設中文版「請按下此連結」當中「按下」係一個掣,英文「Please click this link」,語句完全唔同,應該邊個字造成掣?所以要傾點樣統一。
 
問:點解做呢行?有前景嗎?
 
答:好多人睇唔起呢行,叫我哋做「I.T.狗」。的確,公司入面嘅I.T.部門,部分確係福利待遇差,而且任何同「電」有關嘅事都搵你,就連換燈膽都係你;加上人工偏低,特別係新入職個班,升職唔快,所以流失率高。另外十幾年前科網爆破,好多人唔揀呢科讀,形成依家青黃不接嘅局面,所以個趨勢係需求率上升緊。

近年香港好缺乏資訊科技程式員 ( I.T. Programmer ),特別係有經驗嘅人,依家人工升幅算高,但多數係有經驗嘅一群。我覺得做呢行係足夠養妻活兒嘅,但要勤力,做吓Freelance,畢竟依家好多公司都唔會養一個I.T.部門,佢哋唔介意比幾千至一、兩萬元搵Freelance寫個網頁;因為做得好嘅網頁或者手機系統,慳到嘅錢唔係七、八位數字咁簡單。

我好早已經對客,做埋系統分析,間唔中幫埋手機程式研發,所以淨係收一份人工。但呢啲經驗係日後搵工時好有用。
 
Become our fans