4個對面試的誤解 | cpjobs.com
Home > Career Advice > How To Find A New Job > 4個對面試的誤解

4個對面試的誤解

Published on Monday, 16 Apr 2018
Interview(面試)呢單嘢看似好嚴肅,有啲人形容,入面試室就好似上刑場一樣,來回地獄又折返人間,畀人折磨完一輪先可以行返出嚟。最近幫一位朋友準備面試,佢叫草莓,有一份夢想嘅職業,不過一直都見唔成。草莓好驚面試,因為緊張關係,無論之前做咗幾多準備,入到房個腦都會一片空白,最後唔知自己講咗啲咩就行返出嚟,所以佢形容面試係一種折磨。近來都有網友會分享一啲佢地對面試嘅睇法,發現好多人都好似草莓咁對面試有啲誤解。面試心理狀態好重要,如果被誤解影響,成功又會離你遠一步。
 
1.面試官嘅興趣係置人於死地
 
面試官都有好多種,有啲平易近人,有啲就問得兇狠,不過無論邊種都好,佢地係唔會殺人。有位朋友同我講,佢覺得面試官做面試嘅目的就係要問到你冇聲出為止,咁就可以輕鬆Fail你。佢講到好似大逃殺咁,成間房血淋淋,邊個留到最後先可以有命行返出間房。其實面試官邊有咁得閒同你玩大逃殺,佢問得多,最終目的都只有一個,就係想請到一個適合呢份工嘅人。你先入為主覺得佢留難你,信心就會差,表現自然會更差。
 
2.被挑戰一定唔係好事?
 
面試過程當中,好多求職者都好怕不停畀人追問、挑戰自己嘅諗法。當畀人挑戰之後,求職者通常有三種反應,第一種係有少少動搖,然後口窒窒。第二種係口窒窒咁堅持自己嘅答案。最後一種係充滿自信咁堅持自己嘅答案。最後一種表現比較好,但當然都要視乎佢堅持緊啲乜。面試被挑戰有時未必係壞事,佢只係想知多啲你嘅想法。先唔好太緊張,畀啲信心表達返你嘅觀點。可以的話,面試前搵身邊嘅朋友幫幫你,睇下佢地聽完答案會唔會覺得唔合理,可能會發現自己睇唔到嘅盲點。
 
3.留返個位畀佢問?
 
最近我發現有幾位朋友都有一個好奇怪嘅邏輯,佢地喺答問題時刻意將答案「留一手」。「留一手」嘅意思係刻意唔答曬問題需要嘅答案,而只搭一部分。問佢地點解咁做,佢地話:「因為我怕畀佢追問唔識答,所以好似要留返啲嘢畀佢問好啲。」首先答題唔完整,已經先製造咗一個負面印象畀interviewer。另外,如果你嘅答案本身唔夠說服力,就算留幾手都冇用,因為佢一定會問到佢滿意為止。其實只要答好內容就足夠,唔需要咁關心面試官點樣問你問題。
 
4.答得流暢就係最好?
 
面對要用英文作答嘅面試,好多時大家第一樣擔心嘅就係英語嘅流暢度。有位朋友去做面試一定會準備份英文講稿,為保持流暢度,面試時就成篇背出嚟。其實如果背的話,語氣語調都比較生硬,人地一定聽得出。面試係一種溝通,唔係單方面嘅演講,想人地聽得入耳,千祈唔好死背答案。
HR小薯蓉

HR小薯蓉 Facebook Page blogger,做咗HR十年多,由薯仔做到變薯蓉。見盡奇形怪狀CV、見工奇行種、各式各樣嚇死HR事件,深明做HR嘅辛酸。堅信人先係公司最大資產,專業能夠改變HR邪惡嘅形象。2016年開設個人網誌,2017年5月推出《我係邪惡HR》一書,貼地分享HR世界。

Become our fans