放假想瞓到自然醒，點知九點樓下就準時開工打樁。由我讀緊小學時，日日喺街行過見到Banner話某某區議員爭取起個地鐵站，十幾年後幸而我未搬走，終於動工。喺附近買咗私樓嘅人，應該笑笑口計算緊樓價會升到幾多。

諗返起，之前曾經喺一間建築承辦商工作過，主要做請人同計糧，當時自己有份負責睇幾個鐵路工程，情況著實慘不忍睹！耗資過千萬嘅工程，點解一而再，再而三咁延工？問題在於人手不足之餘，又唔願意花時間搵方法留人。

地盤工人係最高流失率嘅一批，雖然已經擴大勞工市場去聘請外籍人士，不過距離目標仲係好遙遠。差唔多有一半工人做唔夠一星期就遞信或者突然「潛水」幾日再若無其事出現，每日不停出新合約、離職證明、計尾糧，仲要睇Timesheet逐分鐘計算返佢地嘅遲到早退嚟扣減各式各樣嘅津貼，七日內要完成。如果揸正嚟做，無故曠工係要出Warning，要搵佢地嘅上司同佢地「傾下計」。但係啲管工一來自己一人做緊幾個人野，二來心明人手短缺，就隻眼開隻眼閉唔過問，見佢做野無咩大過失就由得佢。大家為份糧，無士氣可言。上頭只識催逼要如期做完，否則公司要賠錢。結果？Hea嘅愈hea，走嘅走。

自己當時喺公司都聽到好多善意嘅大話，「你比心機啲做，完咗呢個Project賺到錢有Bonus分比你。」、「要你O.T.咁多知你辛苦，睇吓第時無咁忙就補返日假你抖吓啦！」、「幫幫手搞掂啲數，我地無咗你真係唔得架，下次我請成條Team食餐勁嘅！」云云幾句好聽嘅說話聽入耳。幾日後，只得上司一句：「阿熊，Good job，今日準時返去休息下啦！」準時？唔係補日假咩？唔係有Bonus分咩？天真嘅你只有滿身疲憊。工作上嘅承諾唔可信，即使上司講到將來點樣捧你上位，加你人工，佢同你一樣係打工仔，可以隨時遞信走人，拍晒心口嘅承諾追究唔返。香港人好醒目，一日未完成件事，一日都會抱住懷疑嘅態度。

唔難發現，好多港資公司鍾意充當大頭鬼。Bid到咁大單工程，但無足夠嘅資源同人手去配合，就向下施壓亂推。到鐵路公司追究時，又只係識亂咁塞啲圖則、照片和文件比佢地「睇住先」，蒙混過關。試過好多次，打電話追問離職原因，不外乎係隔離公司出多一倍價錢挖走同埋上司對待唔公平。咁就表示咗，職位不論高低，有價有市嘅時候你仲唔著緊啲就將手上有嘅野逐少逐少拱手相讓咗比對頭人。

正如鐵路工程，一拖十幾年，講到交通將會幾咁四通八達，便利居民生活。如今落實咗，就可以將咁耐以嚟折騰我地嘅時間忘記得一乾二淨？「大忘人」未做好承諾卻年年加我地車馬費，又出現愈來愈多事故，叫我地點甘心呢？

圖：Shutterstock

以上文章刊於《招職》。